Dantza garaikidearen euskal aitzindariei buruzko erakusketa irekita Huarten

2015/02/11

Otsailaren 6tik maiatzaren 3ra ikusgai dago Huarten Jose Lainez-en eta Conchita Martinez-en lanei buruzko Dantzatzeko ez diren koreografiak erakusketa. Erakusketarekin batera, hainbat jarduera egingo dituzte datozen hilabetetan Huarte Zentroak , Donostia 2016 k eta Gipuzkoako Dantzagu...

Otsailaren 6tik maiatzaren 3ra ikusgai dago Huarten Jose Lainez-en eta Conchita Martinez-en lanei buruzko Dantzatzeko ez diren koreografiak erakusketa. Erakusketarekin batera, hainbat jarduera egingo dituzte datozen hilabetetan Huarte Zentroak, Donostia 2016k eta Gipuzkoako Dantzaguneak lankidetzan, Huarten eta Donostian. Jose Lainezek eta Concha Martínezek dantza garaikideari egindako ekarpena balioan jartzeko ekintzekin batera, gaur egungo sortzaileen lana sustatzeko eta ezagutarazteko hainbat jarduera egingo dira. Erakusketatik areago, ekintza-sail zabala jasotzen duen proiektu zabala da Dantzatzeko ez diren koreografiak.

1968an Amsterdametik itzuli eta Anexa eta Yauzkari konpainiekin dantza garaikidearen lehen urratsak eman zituzten Jose Lainez-ek eta Conchita Martinez-ek Euskal Herrian. Iazko azaroan Bilboko Investigación en Danza kongresuan egin zen proiektuaren aurrerapena. Las Negras produkzio-etxeko Bertha Bermúdez eta Maite Bermúdez dira erakusketaren komisarioak.

Dantzatzeko ez diren koreografiak erakusketan ikus litezke José Lainezen eta Concha Martínezen sortzeko eta lan egiteko modua erakusten duten irudiak, testuak eta atrezzorako objektuak. Horrekin jaso nahi izan dute espainiar estatu mailan ere dantza garaikidearen aitzindaria izan zen bikotearen ondare koreografikoa. Huarte Zentroko erakusketarekin hasi da beraz José Lainez eta Concha Martínez koreografoen inguruan egingo den jarduera-saila.

Informazioa: Dantzatzeko ez diren koreografiak (Huarte Arte Garaikide Gunea)

Gipuzkoako Dantzagunea

Dantzagunea Gipuzkoako Foru Aldundiak dantzaren ikaskuntza eta sorkuntza prozesuak laguntzeko eta sustatzeko sortutako zerbitzua da. Errenterian du egoitza, Niessen eraikinean.

Kulturaren Euskal Planak dantzaren alorreko lan-lerro nagusitzat jo zuen herrialde bakoitzean dantzarako baliabideak izateko erreferentziazko gune bat irekitzea.

Dantzagunean mota guztietako dantzak, bereziki lantzen direlarik dantza klasikoa, garaikidea eta euskal dantza tradizionalean bildutakoak. Bertatik eskeintzen dira Gipuzkoan dantza jardunean ari diren elkarte, konpainia eta eragileei laguntzeko zerbitzuak eta inguruko lurralde eta erkidegoetako antzeko entitate eta zentruekin elkarlana bilatzen da.

Dantzagunearen lan-lerro nagusiak honakoak dira:

1- Sorkuntza koreografikoa sustatzea, sortzaileei eta taldeei Dantzaguneko aretoak utzita, eta egonaldi-programa bat, Sortutakoak, sustatuta.

2- Sorkuntza-prozesuak laguntzea, aholkularitza artistikoaren bitartez; eta dantzaren sorkuntzaren eta produkzioaren inguruko ikerketa garatzea.

3- Prestakuntza espezializatua ematea, gaur egun Gipuzkoan ematen den formazioa osatzeko, alderdi tekniko-praktikoak eta teorikoak landuta.

4- Dantza hedatzeko formula berriak bilatzea, publikoa sentsibilizatzea eta dantza eskola-programetan sartzea.

5- Dantzarekin zerikusia duten gaiei buruzko informazio eta dokumentazio baliabideak interesa dutenen esku jartzea: eskolak, bekak, audizioak, konpainiak, ikuskizunen ekoizpena, hedabiderako kanalak...