Jesus Mari Uribelarrea dantzari, dantza-maisu eta atabalaria hil da

Jesus Mari Uribelarrea "Txiflis" Iurretako dantzaria hil da 65 urterekin. Gazte hasi zen dantzan, eta Iurretako dantzari taldean aritzeaz gain 1970eko eta 1980ko hamarkadetan hainbat aurresku txapelketa irabazi zituen. Ondoren, bere atzetik etorri zen belaunaldiaren dantza-maisua izan zen. Mallabira ezkondu ondoren, bertako dantzari-gazteen irakasle jardun zuen, eta bereziki erregelak irakasten lan handia egin zuen. Hain zuzen ere bere omenez egingo den hileta zibilean erregelak dantzatuko dituzte bere ikasle izan ziren dantzari mallabiarrek, bere hiloba iurretarrak eta baita beste dantzaren batzuk ere Iurretako bere dantzari-lagunek ere. 

Dantza eta kantu mundutik oso gertu beti, luzaroan atabalarekin ere aritu izan da Iurretako dantzariei erritmoa markatzen. Iurretako dantzariek, Aitte San Migel doinuarekin, honako kopla egin zioten Uribelarreari:

Orain nerbijo bako mutilla
baiña dantzari abilla
aurreskularirik iñun bada
'Txiflis'-engana etor dadila

Dantzan ez ezik kulturgintzako beste hainbat arlotan ere aritu da lanean. Mallabian han dantza irakasle aritzeaz gain Jasokunde abesbatzaren sortzailea izan zen. Ondare inmaterial zein materialarekiko sentsibilitatea erakutsi du, Mallabiko baserrietan gordeta egon diren garai bateko lanabes eta tresnak jaso zituen Baserriko lanabesak, tresnak eta trepetxuek. Iragandako bizimodu baten (2016) liburuan. Justo Azagirre eta Pello Mugarzarekin batera aritu zen lan horretan eta Gerediaga elkartearekin elkarlanean argitaratu zuten.

Gaur, asteazkena, apirilaren 10ean izango da bere aldeko hileta zibila, Mallabiko parkean, 19:00etan.

Ondorengo bi bideoetan 1982ko eta 1985eko San Migel egunean Iurretan herriko Mikel Deuna dantza taldeak eman zituen dantzak ikus daitezke, eta horietan atabala jotzen ageri zaigu Jesus Mari Uribelarrea.