Dokumentuaren akzioak
Albisteak
"Folklorea ikus-entzunezkoetan" aztertuko da Bilbon
Eusko Ikaskuntzako Folklore Sailak antolatutako jardunaldiak urriaren 20an burutuko dira. Folklore mundua argazki, zine eta bideo kameren objektiboekin islatu duten hainbat ikertzaile eta sortzaile garrantzitsuk parte hartuko dute jardunaldietan. Pío Caro Baroja, Koldo San Sebastián, Maria Ángeles Sánchez edo Santiago Yañiz dira besteak beste jardunaldietan beren aurkezpenak egingo dituztenak.
Dantza tradizionalak San Migeletan
Asteburuan ospatuko dira San Migel jaiak, larunbatean baita irailak 29, San Migel eguna. Hainbat dantza tradizio interesgarri ikusi ahal izaten dira San Migel egunaren inguruan: Ezpata-dantza Markina-Xemein-en, dantzari-dantza eta erregelak Iurretan, Paloteadoa Cortes-en eta soka-dantza Iruran besteak beste. Hona gida labur bat:
Kolonbian dabiltza dantzan Aurtzakako dantzariak
Beasaingo Aurtzaka dantza taldeko dantzari eta musikariak Kolonbian daude egunotan, bertako hainbat hiritan emanaldiak eskaintzen. Pasa den igandean Zipaquiráko katedralaren auditorioan emanaldia eskaini zuten eta datozen egunotan Chia, Funza, Bogotá, Ubala eta Gamma bisitatuko dituzte.
Dantzari Eguna ospatuko da Gasteizen irailaren 30ean
Euskal Dantzarien Biltzarrak antolatuta, Euskal Herriko Dantzari Eguna Gasteizen ospatuko da 2007ko irailaren 30ean. Gasteizko Judimendi inguruetan egingo dira Dantzari Eguneko ekitaldi nagusiak.
Dantza hirian 07 Donostia, Irun, Hendaia eta Baionan
Irailaren 12tik 22ra burutuko da Euskal Eurohirian (Donostiatik Baionara bitarteko eskualde horretan) Dantza Hirian 07 ekimena. Dantza garaikidea kaleratu eta jendearengana hurbiltzeko ekimena da Dantza Hirian eta Europako "Dantzatzen diren hiriak" egitarau zabalaren baitan kokatzen da.
Igartzako dantzak aurkeztuko dira igandean Beasainen
Aurtzaka dantza taldeak sustatuta, Beasaingo Igartzaren inguruan burutuko den dantza ekitaldi berezi bat jarriko da abian igandean, irailaren 9an. Igartzako eraikinak zaharberritzeko egiten ari diren lanekin bat eginez, dantza erritual bat berreraikitzen hasiko dira asteburuan.
Andra Mari taldearen egitaraua Galdakaoko jaietan
Irailaren 7tik 16ra ospatuko dira aurtengo Galdakaoko jaiak eta urtero legez Andra Mari taldeak hainbat ekitaldi gauzatuko dauz. Hemen joatzue Andra Marik antolatutako ekitaldien zerrenda:
Dantza autoktonoen jaialdia Basaurin
Lekeitioko eguzki-dantza eta kaxarranka, Eltziegoko dantzak, Gipuzkoako brokel-dantza eta soinu zaharrak, Lizarrako dantzak, eta Lapurdi, Nafarroa Beherea eta Zuberoako inauterietako dantzak ikusi ahal izango dira datorren irailaren 15ean Basauriko Bizkotxalde parkean. Dantza autoktonoak zutabe dituen Euskal Herriko Dantza Agerketaren 35. ekitaldia izango da.
Maitaldia hegoaldera begira
Irailaren 7tik 16ra burutuko da Maitaldia dantza egitarau mamitsua Miarritzen. Aurten hegoaldera begira jarri da jaialdia eta hamar egunez Europako hegoaldeko, Indiako, Brasileko, Burkina Faso, Argentina eta abarreko proposamen koreografikoen erakusleku izango da Miarritze. Estilo eta jatorri guztien biltoki izango da Maitaldiaren 17. ekitaldia.
Donostia Dantzan erromeria irailaren 1ean
Irailaren 1ean Konstituzio plazan ohiko Erromeria izango da, arratsaldeko 19:30etatik 21:00ak bitartean. Donostiako Udaleko Txistulari Taldea izango da jotzailea eta Aitziber Aiesta eta Fernando Ruiz aurkezle eta animatzaileak. Oholtza gainetik edo plaza erditik jendeari zer eta nola egin erakutsiko diote, baita giroa berotzen lagundu ere.
Dokumentuaren akzioak
