Lesakako argazki zaharretan dantzariak ezin falta

1.000 argazki inguru bildu dituzte Lesakako Udalak eta herritar talde batek elkarlanean. Horien artean dira, nola ez, XX. mendeko hainbat dantza irudi; herriko ezpata-dantzariak, fraindarrak eta goitarrak edota erromeriak aurki daitezke, besteak beste. Azken hilabeteetan, herritarrei deia luzatu diete etxeetan dituzten argazki zaharrak udaletxera eramateko. Herriko argazki zaharrak bildu eta digitalizatu dituzte eta udalaren webgunean Lesakako argazki artxiboa edonoren eskura ipini dute. Horrez gain, argazki horietatik guztietatik 150 aukeratu eta erakusketa osatu dute. Aukeratutako argazkiak ikusgai izango dira azaroaren 2tik 10era Harriondoa kultur etxeko komentuan.

Dantza irudietan nagusi dira ezpata-dantzarienak. 1920-30 bitartekoak dira zaharrenak.

Ezpata-dantzarien Lesakako San Fermin eguneko argazkiak ez ezik, Lesakatik kanpokoak ere aurkitu ditugu. Hendaian egin zuten erakustaldi batekoak edo Elizondon, Baztandarren Biltzarrean, parte hartu zuteneko honako hau, adibidez:

Egun, 2019tik, gizonak eta emakumeak irteten dira ezpata-dantzan, baina argazki zaharretan gizon ezpata-dantzariak bakarrik ageri dira. Horrek ez du esan nahi emakume dantzaririk ez zenik Lesakan. Taldeko argazkietan edota dantzan ere ageri dira.

Baita herritarrak erromerian ere.

Haur dantzarien irudi hau ere agertu zaigu.

Bestalde, aipatu, inauterietako argazki asko jaso direla, tartean goitarren irudi eder hau:

Lesakan dantzariak, mozorroak eta baita Olentzeroren argazkiak ere. Aspalditik izan dute errotua Olentzeroren ohitura Lesakan, 1960-70eko hamarkadako olentzeroen argazkiak jaso dituzte.

Argazkiak: Lesakako artxiboa