Biba Muskilak! Biba inauteriak!

Iruña Taldeak plazaratzen dituen Animalien dantzek urtero iragarri izan dituzte inauteriak Iruñean, hauek iritsi aurreko asteburuan. Animalien dantzekin eta Margarito hartza lozorrotik esnatzearekin ematen diogu hasiera egunari; arratsaldean kalejiran iblitzen gara, Alde Zaharra alaitzen; eta eguna dantzan bukatzen dugu.

Orain arte Kauterak ospatu izan ditugu, eta kauterez jantzi izan gara ere. Azken urteetan apropiazio kulturalaren eta arrazekeriaren aferak sortutako deserosotasunak eta horren inguruan emandako eztabaidak direla eta, gaiari heltzea erabaki dugu, eta elkarte bezala, eraldaketa prozesu batean murgildu gara. Prozesu horretatik kimu berriak sortu dira.

Aldatu beharreko edukiak zeudela argi genuen, baino mantendu nahi genituen gauzak bazirela ere argi genuen: animalien dantzak, Margarito hartza, arratsaldeko kalejira, gaueko kontzertuak... Bestaren parte dira, eta gurekin mantendu nahi ditugu.

San Lorentzo kalea, gure kalea, antzina Burulleroen kalea zen. Burulleroak, oihal zein zakuekin lan egiten zuten pertsonak ziren. Artile-hondarrak, ahuntz-ilea eta espartzua landuz eta trabatuz, eguneroko bizitzarako oinarrizkoak ziren produktu erresistenteak sortzen zituzten, hala nola, zamak garraiatzeko zakuak, koltxoiak egiteko oihalak eta jantzi edo oihal oso latzak. Hari horretatik tiraka, trapu eta oihalekin janztea erabaki dugu, inauterien eta udaberriaren ikur diren koloretako oihalekin. Aurpegia estaltzeko, goizean karriketan dantzatuko duten zaldikoak eredutzat hartuz, lumaz apaindutako maskarak jantziko ditugu.

Eta, nola deituko diogu egunari? Nola deituko gara?

Muskila lorea atera aurretik dagoen kimua da, udaberria iragartzen duena. Guk, muskilen antzera, udaberriaren koloreen bitartez, urtero inauteria iragartzen dugu.

Fidatzen bazara jantzi maskarak eta batu zaitez Muskilekin batera kaleak hartzera. Gu inauteriak iragartzera aterako gara aurten ere, otsailaren 7an.

Biba Muskilak! Biba inauteriak!