Larunbat honetan (otsailak 25), Beasaingo Inauterietako dantza-desfile herrikoia Ostadar Dantza Taldearen eskutik

Urtero legez, Ostadar Dantza Taldeak dantza-desfile herrikoia eskainiko du Inauterietako larunbatean Beasaingo kaleetan zehar (otsailak 25). Aurten ere, Euskal Herriko hainbat lekutan egun hauetan ikus daitezkeen inauterietako dantzak eskainiko dituzte.

Ohi bezala, dantza taldeko kideez gainera, musikari laguntzaileak zein taldeak antolatutako entseguetara azaldutako herritarrak irtengo dira. Dena den, dantza-desfile irekia izango denez, larunbatean bertan herritarrei dantzara irteteko deia luzatzen die dantza taldeak elkarrekin inauteriak ospatzeko.

Ibilbideari dagokionez, desfilea 10:30ean hasiko da taldearen egoitzan (Oriamendi kalea, 10), eta herriko kale nagusiak zeharkatuko ditu eguerdia bitartean. Eguraldi txarra egingo balu, berriz, dantza desfilea Gernika Pasealekuko frontoian eta Loinazko San Martin plaza azpian egingo da.

Arratsaldean, berriz, festak jarraipena izango du, izan ere, Muxutruk taldeak erromeria eskainiko duelako 19:00etatik aurrera Loinazko San Martin plaza azpian (erromeri hau Goierriko Erromeri Biraren hurrengo emanaldia izango da).

Azken entsegu irekiak:

Desfilean parte hartzeko interesa duen edonorentzat, hauek izango dira azken entsegu irekiak (guztiak taldearen egoitzan izango dira):

• Asteazkena, hilak 22, 18:45ean edota 20:00etan
• Ostirala, hilak 24, 20:00etan

Ostadar Dantza Taldeak beasaindar eta parte hartu nahi duten guztiei luzatzen die gonbitea elkarrekin inauteriak giro onean ospatzeko. Informazio gehiago nahi izanez gero, entseguetara azalduta edota ostadardt@gmail.com helbidera idatzita jar daiteke taldearekin harremanetan.