XX. mendeko familia baten bizitza dantzaren bidez irudikatua 'Urraska'-n

Zarena Zarelako elkarte berriaren lehen sorkuntza da Baionako antzokian emanen dutena asteburuan

Ikusgarria bost zatitan banatu dute, agerraldi bakoitzak familiak bizi memento esanguratsu bat irudikatzen duelarik. Koldo Ameztoi ipuin kontalariak idatzi eta irakurri testuak eginen duela agerraldien arteko lotura, Urraska oroz gainetik dantza ikusgarria da, proiektuaren oinarrian dagoen Benoit Lamerainek dioenez, xede nagusia dantzari zuzendua: «Euskal dantzari ikuspegi berri bat eskaini nahi diogu».

Lamerain, berez, txistularia da. Getariako (Lapurdi) dantza taldean ari bereziki, beste leku zenbaitetan musikariak eskas zituztela eta, han eta hemen ibiltzeko aukera izan duela dio azken hamar urte hauetan . Eta hortik, ohar hauek bururatu: «Ideia eta sosa eskasa, taldeen motibazioa apal, tradizioaz akituak anitz, beti dantza berak, bereziki turisten aitzinean ematen direnak... Horren aitzinean bi aukera ikusi ditut: egoera usteltzera utzi edo zerbait proposatu. Dantzari onei proiektu berri batean parte hartzeko aukera eman nahi nien. Euskal dantzaren urratsak oinarritzat hartuz, gustukoak ditugun beste herrialdeetako musika eta eraginak sartu ditugu. Zeltak eta georgiarrak, adibidez». Dantza koreografiak Pascale Lascanok eginak ditu, hau ere Getariako taldekoa. Urraska lehena du.

Hogei dantzari dira orotara eta zortzi musikari. Hazparne, Donapaleu, Getaria, Itsasu, Bardoze, Zuraide, Lekorne eta Senperekoak, Lamerainek aukeratuak: «Emaitza bisuala garrantzitsua zait. Jantziak ongi eramaten dituztenak dira denak. Gorputzetatik zerbait jalgiarazten dutenak». Zenbatekin zuzenki harremanetan sartzeaz gain, hautaproba bat antolatu zuen Getarian, eta bertan aurkeztuen artean egin zuen azken hautaketa. Jantziak ere ikusgarriko beste «puntu nagusi» bat dira. Garaiko jantzi zibiletatik inspiraturik, Catherine Kraushaarek eginak ditu.

Proiektuak 15.000 euro balio du, antzokiaren alokairua barne. EKEren laguntzarik gabe ezingo zutela gauzatu proiektua azpimarratu nahi izan du Lamerainek. Hori bai, ikusgarria antzoki eder batean ematea ezinbestekoa zitzaion Lameraini: «Baldintza onak beharrezkoa dira, bai dantzari, musikari baita ikuslearentzat. Errespetatu behar dira. Euskal dantza ikusgarri batentzat inportanta da jarleku erosoak proposatzea». Sartzeak Baionako Elkarren salgai dira.