Dokumentuaren akzioak
Urrutiko dantzak gerturatuko ditu beste behin Portugaleteko Folklore Jaialdiak
Errusia, Armenia, Txina, Zeelanda Berria, Peru eta Hegoafrikako dantza taldeak ariko dira aurten
Txina, Armenia, Mari-El (Errusia), Zeelanda Berria, Peru eta
Hegoafrikako kulturek izango dute lekua aurten Portugaleteko Folklore
Jaialdian, Euskal Herriko folklorearekin batera, hilaren 19tik 25era.
Elai Alai dantza taldearen ekimenez antolatzen den 35. jaialdia izango
da, eta antolatzaileek adierazi dutenez, irizpide «exotikoak» erabili
dituzte herrialdeak eta taldeak aukeratzerako unean. Baina bisa arazo
bat baino gehiago izan dute. Jaialdiko zuzendari Jose Ignazio Beitiaren
esanetan, «tamalez, herrialde atzeratuak dira ekonomikoki, eta
kontsulek luparekin behatzen dituzte partaideak. Hasieran iragarritako
zazpi taldeetatik, bat gelditu da programaziotik at: Sri Lankakoa. 28
taldekideetatik 11k soilik lortu baitute baimena. Ea datorren urtean
ekartzerik dugun». Gainerakoan, beste sei taldeek normalki eskainiko
dute ikuskizuna.
Portugaletek ekingo dio folklore festa aterpetzeari. Iazko
bideari jarraituta, kalean egingo dituzte emankizunak. «Jendearengandik
gertuago dago horrela. Gainera, hiru egunetan eta emankizun luzeak egin
beharrean, bost eguneko jaialdia egitea pentsatu dugu, emankizun
laburragoekin», azaldu du Beitiak. Portugaleteko egitaraua igandeko
inaugurazioaren ostean hasiko da, eta uztailaren 20tik 25era arte
izango dira ikuskizunak, San Roke plazan, 21:30etik aurrera. Honetaz
gain, musika saioak antolatu dituzte hilaren 20 eta 27rako.
Udalerri bizkaitarrean aipaturiko herrialde guztiak egongo
dira ordezkatuak. Alabaina, ez da horrela izango Deba eta Elgoibarren
kasuan. Euskal Herriko giroaz gain, Armenia eta Hegoafrikako
ikuskizunez soilik gozatu ahalko baita Elgoibarren, uztailaren 24an.
Bestalde, Debak, Txinako dantzariak hartuko ditu Debabarreneko dantza
taldeekin batera. Hori, ordea, uztailaren 30ean izango da, Calbeton
zumardiko kioskoan.
Bestalde, Araba, Bizkai eta Gipuzkoako beste hainbat herritan
ere egongo dira ikuskizunak. Jaialdi hauek, «gurea erakutsi eta besteak
ezagutzeko aukera» ematen dutela nabarmendu du Miren Dobaranek,
Bizkaiko Foru Aldundiko euskara sustatzeko zuzendariak.
«Globalizazioaren aro honetan, gure balioak konplexu barik defendatu,
eta besteak xurgatu behar ditugu» azaldu du.
Zazpi herrialde, mila kolore
Nairi Folklore Taldea izango da Armenia ordezkatuko duena.
Txinatik, Guizhou-ko Hego Ekialdeko Kantu-Dantzetako Konpainia etorriko
da. Bestalde, Whitireia konpainiaren esku izango da Zeelanda Berriko
dantzak erakustea. Perutik, Cosandamak taldeak izango du jaialdian
parte hartzeko ohorea. Errusiako errepublika autonomoa da Mari-El.
Estatuko izen bereko dantza taldeak islatuko du hango dantzen
edertasuna. Hegoafrikari dagokionez, Gauteng probintziako talde bat
gonbidatu dute. Munduko folkloreaz gain, Euskal Herrikoak ere izango du
bere lekutxoa.
Dokumentuaren akzioak