Ugutz Robles-Arangiz kultur ekintzailea zendu da

Euskal Herria eta euskara erdigunean jarriz oso bestelako kultur eta herri egitasmoetara lotu zen bere bizitzan zehar, ostegun huntan 83 urterekin zendu den Ugutz Robles-Arangiz.

Robles-Arangiz frankismotik ihes egin behar izan zuen familia abertzale batean sortu zen, 1939an Bidarten. Aita, Manu Robles-Arangiz, ELA sindikatuko lehendakaria izan zen. Estitxu, arreba, goizegi zendutako kantari aparta, Irkus anaia margolaria, Naia iloba abeslaria, Ugutz bera txiste kontalari eta kantari… Joseba Aurkenerena idazle urruñarrak azaldu bezala, «denak sendi honen adarretatik sorturiko artistak ditugu».

Beskoitze eta Bilbo artean

Mintzoak Ipar Euskal Herriko ahozko memoriaren atariak jasotzen duenez, Ugutz Robles-Arangiz Beskoitzeko eskolara joan zen 1944tik goiti. Gerla denboran, familia ahal bezala bizi zen laborantzaz, aita erresistentzian sartua zelarik.

Robles-Arangiztarrak 1952ean itzuli ziren Bilbora eta Bizkaiko hiriburuan lau haizeetara zabaldu zuen Ugutz gazteak bere kultur zaletasuna. Arte eta Ofizioen eskolan ikasi zuen eta berdin pintura, antzerkia edo dantza alorretan jarduteko aukera baliatu zuen. Txinparta taldean aritu zen antzerkia egiten eta dantzari gisa Olaeta balletaren baitan jardun zuen. Tenore ahotsa zuen baita ere eta Soroak Lakoarekin ibili zen.

Bi anaia atxilotu zituztenean 60ko hamarkadan, 21 urte zituela berriz Ipar Euskal Herrira itzuli zen. Antzerkigintzaren aro oparoa bertatik bertara bizi izan zuen. Beskoiztarrak taldearekin aritu zen eta Telesforo de Monzon eta Piarres Larzabalen antzezlanak taularatu zituen. Daniel Landarten bultzadapean eratu zen Euskal Antzerkilarien Biltzarreko partaide izan zen.

70eko hamarkadaz geroztik umorearen generoa bere egin zuen. Txiste kontalari gisara jardun zuen, bai herri ikuskizunetan bai hedabideetan. Beskoitzen erroturik, bere familiaren Leku Eder etxea bizileku izateaz gain, bertan Amalur jatetxea ireki eta atxiki zuen 1975etik 1988ra.

Ikastolen alde, bakegintza sustatuz

Ugutz Robles-Arangizek bere bizi osoan zehar euskal kultura bultzatu zuen, betiere abertzale ikuspegiarekin txertatuz. Ikastolen aldeko zein bakegintza sustatzeko ekimenak babestu zituen.

Bere heriotzaren berri zabaldu bezain pronto dolumin mezu ugari heldu dira. Beskoitzeko ikastolak mezu hau plazaratu du Facebook sarearen bidez: «Doluminak Beskoitzeko ikastolako familia guzien partez. Oroituko gira beste ainitzen artetik Manex Pagolaren omenaldian, Urketan, Ugutzek nolako giroarekin animatu zuen omenaldiaren ondoko afaria. Ez adiorik eta mila esker!».

Kike Amonarriz Euskaltzaleen Topaguneko lehendakariak ere txio bat egin du. Izan ere, Ugutz Robles-Arangizekin batera aritu baitzen ETBn Txiskola programan.