Hemen zaude: Hasiera Hemeroteka 'Ttakun ttan ttakun' ikuskizun berria aurkeztuko du Beltranek gaur, Iruñean

Dokumentuaren akzioak

'Ttakun ttan ttakun' ikuskizun berria aurkeztuko du Beltranek gaur, Iruñean

Txalapartaren soinuen inguruko bidaia prestatu du musikariak, Kukai Dantza Taldearen parte-hartzearekin

Egilea
Alberto Barandiaran
Komunikabidea
Berria
Tokia
Iruñea
Mota
Albistea
Data
2009/11/12

Ikuskizun «intimoa, magikoa eta pixka bat fantastikoa», hori da lana. Musikaren soinuak, argi eta itzalen bidez irudikatuak, dantzariekin, musikariekin eta landa giroko doinuekin. Eta, nola ez, txalapartaren kolpeekin.

Beltranen proiekturik handinahienetakoa da, ikuskizunean oinarritutako CD bat, DVD bat eta 250 orriko liburu bat ere argitaratuko duelako batera, Durangoko Azokan. Liburuan, txalapartaren inguruan orain arte egindako ikerketa lan garrantzitsuenetakoa egin du Beltranek, Iñaki Zarataren laguntzarekin. Bertan, tresnaren historia kontatu dute, lanabesa zenetik gaur arte. Horretarako, musikariak azken urteotan egindako bilketa eta ikerketa lan guztia baliatu dute, eta Euskal Herriko zein kanpoko txalapartarien lekukotasunak bildu dituzte. Halaber, hainbat txalapartariren eta txalapartarekin lotutako pertsonen lekukotzak ere irakurri eta entzun ahal izango dira. Baita hainbat grabazio ere, aspaldikoak zein gaur egungoak. Atal batean, txalapartaren eta hizkuntzaren arteko harremana jorratu dute.

Liburua Nerea argitaletxearekin elkarlanean argitaratuko da. CDan hainbat musika sartu dituzte, JosAnton Artzeren laguntzarekin, eta DVDn, berriz, txalapartaren bidaia kontatu dute, musikaren bidez.

Mireia Gabilondoren gidoia

Gaur Gaiarren aurkeztuko duten ikuskizuna Mireia Gabilondok zuzendu du, eta harena da gidoia. Koreografia Jon Maiarena da, eta txalapartariak, berriz, Juan Mari Beltran, Ander Barrenetxea, Ixiar Jauregi eta Aitor Beltran. Dantzariak, azkenik, Jon Maia eta Vanessa Castaño. JosAnton Artzeren hainbat poema ere irakurriko dituzte.

Ikuskizunean, Kirikoketa igoko dute agertokira, baserrietan sagarra txikitzeko hirukotean egiten zen joaldia, alegia. Iribasko kanpai-jotzaileak kanpai-hotsekin nola aritzen ziren ekarri dute ikuskizunera, eta abereei eman behar zitzaien ote janaren xehatze prozesuko soinuekin jolastu dira. Orobat, eraikuntzan metalezko palankek egiten duten soinua ere txertatu dute. Edo uraren azpian harriak elkarren aurka kosk-kosk eginen sortzen zen musika.

Jon Maia eta Vanessa Castañoren dantzak lagunduta, joaldi tradizionalen soinua, gaur egungo doinuak, poesia eta irudia nahastu dituzte. Helburua, musikatik abiatu baina musikatik harago joatea, «neurri hutsa gainditu eta melodiaren bidean sartzeko, inprobisazioa, elkarrenganako laguntza edo alternantziaren bidez».

Xedea, beste era batera esanda, txalapartatik sortzen den soinuaren mundua erakustea da. «Erakustea» azaldu du Juan Mari Beltranek berak, gaur Gaiarre antzokiko kontzertua aurkezteko prentsaurrekoan, «txalapartaria ere badela palankak jotzen dituena, zein zura edo harriei kolpeak ematen dizkiona, edo, ondo bazkaldu ondoren, mahai gainean koilararekin edo edalontziekin erritmo bila ari dena».

Iruñeko estreinaldiaren ondoren, Tkakun Ttan Tkakun Arrasaten aurkeztuko dute, abenduaren 12an.

Dokumentuaren akzioak