Tradiziotik abangoardiara, dantzan

Okendo Kultur Etxeko erakusketa aretoan 56 argazki, 63 maskara, programa, eskuizkribu, bozeto, maketa eta bideo bat dira ikusgai. Guztiak, Kresala dantza taldeak dantza eszenikora eraman duen iruditegi tradizionalaren isla dira, konpainiak 50 urte (1968-2018) bete dituela aitzaki hartuta sortutako 'Urtaroen azalak gaueko lubakian' erakusketan. Urtarrilaren 26a arte izango da ikusgai. 

Taldearen hainbat une jasotzen dituzten argazkiak gehien bat Juan Carlos Ruiz argazkilariak egin ditu, eta dantzariei egindako gertuko jarraipen estua erakusten dute. Badaude beste argazkilarien lan batzuk ere ikusgai: Iosu Otaegi, José Usoz, Iker Azurmendi, Niko Iturralde, Fernando Martínez, Arturo Delgado eta Boris Lipnitzki-renak, hain zuzen ere.

Erakusketako elementuen artean, Xabier eta Benito Garate Echarrik sortutako maskara ere aipatu behar da.

Erakusketa 'Pausoz pauso, hegaldi isila, hagada luzea katalogoan' jaso da. Argitalpenean lan honetarako propio testu originalak idatzi dituzten adituak daude. Mari Karmen Gil Fombellida, Norka Chiapusso, Rafael Zulaika, Iratxe de Arantzibia, Xabier Mendizabal, Ima Irazustabarrena eta Beñat Ralla Yusta, adibidez.

Euskal Herriko dantza konpainia 1968an sortu zuen Gene Yurrek, zuzendari zela. 1993az geroztik, Faustino Aranzabal izan da zuzendari artistikoa eta 2000 urteaz geroztik, Idoia Ibarzabalek dihardu dantza irakasle eta zuzendari laguntzaile gisa.

Taldearen obren artean nabarmentzen dira 'Hostoak' (1996), 'Soka' (1998), 'Bestaberri' (2000), 'Marixe' (2002), 'Sehaska' (2006), 'Buba eta Bubu' (2011), 'Oteizaren kaxa beltza' (2014) eta 'Zeruko' (2017).