Hemen zaude: Hasiera Hemeroteka Tradizioa berreskuratzen

Dokumentuaren akzioak

Tradizioa berreskuratzen

Lau egunez jai giroa izango da nagusi Andoaingo jaietan; ezpata-dantza berriro izango da

Egilea
Amaia Elizondo
Komunikabidea
Berria
Mota
Albistea
Data
2009/04/30

Aurreko mendeetan ezpata-dantza askotan eskaini ohi zuten Andoainen. «Zenbait liburutan irakur daiteke Andoainen eginiko ezpata-dantzak, baina azken urteetan ohitura galduta zegoen». Grinak eta gogoak bultzatuta, talde txiki batek ohitura berreskuratzeko ahalegina egin zuen, eta aurten, hogeita hemezortzi neska eta mutil aterako dira ezpatak eskuan.

Dagoeneko hiru aste daramatzate dantza entseguak egiten. Otamendik iaz ezpata-dantza erakutsi zien taldeko guztiei. Izan ere, herri guztietan ez da ezpata-dantza berbera eskaintzen. «Herri batzuetan beren ezpata-dantza propioa dute, kofradia eta guzti, baina beste askotan pauso berberak jarraitzen dira». Hala, dantzariek Santa Krutz parrokiaren aurrealdean itxaroten dute udalbatza eta eskopetariak jaitsi arte. Ikurrinaren jaitsiera dela eta, udalbatza iristean dantzatzen dute dantzariek ezpata-dantza. Ezpata handiek, ezpata txikiek eta kapitainak osatzen dute taldea. Mezaren ostean, berriro dantzatzen dute.

Dantzari gonbidatuak

Iaz ezpata-dantzari berriro ekin ziotenean, batzordeko kideek beste herrietako dantzariak gonbidatzeko ahalegina egin zuten. Aurten, Aritz Ibañezek eta Oier Araolazak parte hartuko dute dantza emanaldian. Biek ibilbide luzea dute dantzan, eta andoaindarrekin partekatuko dute, hain zuzen.

Jantziari dagokionez ere goitik behera prestatzen dira dantzariak. «Espartin eta galtzerdi zuriak, pololoak, gona motza, alkandora zuria, zapia buruan eta bi gerriko eramaten dituzte ezpata txikiek. Besteek, aldiz, galtza eta alkandora zuria eramango dute jaka beltza gainean daramatela. Horrez gain, txapela eta gorbata gorria ere soinean izango dituzte». Zalantzarik gabe ikusgarria izango da emanaldia, guztia gustu handiarekin prestatu baitute.

GAUR

19:00. Andoaingo dultzaineroak herriko kaleetan.

23:00. Jaien hasiera pregoia, Kaleberria atzealdea kalean.

BIHAR

11:30. Haur krosa Leizaur parkean.

16:30. Goitibehera txapelketa, Goiburun hasita.

18:30. Herri danborrada, Bekoplazan hasita.

ETZI

11:30. Koadrilen kalejira eta jokoak, Bekoplazan hasita.

18:30. Zirko ttipia.

23:30. Berbena Bekoplazan.

IGANDEAN

10:30. Ikurrinaren jaitsiera.

11:30. Ezpata-dantza.

13:00. Bandaren kontzertua Kale Nagusian.

18:30. Xebastian Lizaso, Jon Maia eta Aitor Mendiluze bertsolariak Zumea plazan.

Dokumentuaren akzioak