Hemen zaude: Hasiera Hemeroteka Thierry Malandain, Miarritzeko 'Dantzaren jauna'

Dokumentuaren akzioak

Thierry Malandain, Miarritzeko 'Dantzaren jauna'

Maitaldia dantza jaialdiaren zuzendari artistiko izendatu berri dute Biarritz Ballet zentro koreografikoko burua, bi entitateen arteko harremana indartzeko asmoz

Egilea
Nora Arbelbide
Komunikabidea
Berria
Tokia
Miarritze
Mota
Albistea
Data
2008/11/14

Agian binaka lan egin zezaketela, eta menturaz zurrumurruek zioten bezala pertsona arazo bat zela gordetzen horren guztiaren azpian, galdera zuzenean pausatu zitzaion Malandaini: «Nik dimititu eta Claveriek berriz bere lekua hartu zuenean zuzendari artistiko gisa, Maitaldia elkarrekin eginen genuela adostu genuen. Garaian, gurekin lan egiten zuen Filgik. Bulego beretan ginen. Lehen hilabeteetan proiektuen berri ematen zidan. Baina Donostiara joan zen egunetik Biarritz Ballet Junior-ekin, eta gaur egun arte, Maitaldiaren berri irailean bakarrik izaten nuen, mundu guztiarekin batera». Horiek horrela, «iragan» bat badela onartu zuen Malandainek: «Ni lanean ari den tipo bat naiz, isiltzen dena eta botererik ez duena nahi. Baina hori ez da denen kasua. Muturreko egoera batera iritsiak ginen». Eta orain zer? «Ni emeki aitzinatzen ahalegintzen ari naiz. Ez botere gosez baina bai, Miarritzerentzat, dantzaren alde baita zentro koreografikoaren alde». Hori baita erronka Malandainen ustez: «Argi izan dadila. Miarritzek bakarrik 30.000 biztanle dituela, zentro koreografiko bat izatea arras salbuespenekoa da, jakinez gainera anitzek nahiko luketela, eta ez dutena. Hori kontuan harturik, egia da ez duela zentzurik hiri bereko bi entitate kulturek ez elkarrekin lan egitea».

Izan ere, Biarritz Balletak alde guztietatik konplimenduak jasotzen baditu eta fama baldin badu, nazioartean asko ari dela, aldi berean, urtea justu -justua bururatzen du: «Garaiak zailak dira denentzat. Maitaldiaren aukeraz baliatzea, zentzu onean, zentroa bizitzeko xantza bat gehiago ematea da. Eta zentroak, berriz, daukan hedaduraz baliatzeko aukera eman diezaioke Miarritzeri».

Bestalde, edo gainera agian, irailetik Ballet Biarritz Juniorrik ez da gehiago, eta horrek ere badu menturaz zer ikusirik aldaketa horietan.

Dantzaz Konpainia Donostian finkatuz joan zen Biarritz Balletarekin elkarlanean duela hiru urte, mugaz gaindiko proiektu bat bezala. Baina irailetik Dantzaz Konpainiak bere bidea bakarrik segitzen du Donostian. Ez du gehiago Biarritz Ballet Junior izenik, eta, beraz, ez du loturarik Miarritzeko zentroarekin: «Izena aldatzea nahi zuen Gipuzkoako diputazioak. Dantzaz izena bakarrik atxiki nahi zuen. Eta izenaz gain, dantzari euskaldunak bakarrik behar zirela kontratatu aipatu zuten argiki. Geroztik, ohartu naiz baldintza hori ez dutela gauzatua, baina, halere, garaian hori erran zidaten, eta nik ezin nuen onartu. Nik unibertsala den arte bat dut defendatzen. Hautua errespetatzen dut, baina hori ez da gehiago nire istorioa. Gure konpainian euskaldunak baditugu, baina baita ere japoniarrak, italiarrak, frantsesak, espainolak. Dantza ezin da mugatu. Badakit Bilboko Athleticek Euskal Herriko futbolariak bakarrik dituela, baina hori ez da nire arazoa. Gaur egungo errealitatea kosmopolita da. Funtsean, betidanik horrela izan da».

Dantzari. 1968an 9 urte zituela hasi zen dantzatzen. 1977an Pariseko Operan sasoi bat egin zuen.

Sortzaile. 60 bat koreografia sortuak ditu.

Biarritz Balleteko buru. 1998an Frantziako Estatuaren ezagutza duen zentro koreografiko hori sortu zutenetik buru da. Baletak 17 dantzari eta lau langile ditu.

Maitaldiko zuzendari artistiko. 2001etik lau sasoiez. Aitzin eta gero Filgi Claverie zen.

Dokumentuaren akzioak