Suak piztuta dirau

Alurr taldeak 'Sua' filmean oinarritutako dantza ikuskizuna aurkeztuko du igande honetan Tolosako Leidor Antzokian Jauntxoen eta herriaren arteko borroka azaltzen dute koreografien bidez

Eneko Aritzaren Lagunak kultur elkarteak egin zuen Sua filmean, 1609an Lapurdin kokatzen den Inkisizioari buruzko istorioa kontatzen da. Istorio horren oinarria jauntxoen eta herriaren arteko borroka da. Dantza ikuskizunaren bidez, egungo garaira estrapolatu ahal den egoera azaldu dute: boterea duenak herria nola zapaltzen duen eta herriak ematen dion erantzuna. Sorginak ere koreografia hauetako protagonistak dira, baina historiak eman dien ikuspegia aldatu nahi izan du Alurr dantza taldeak. «Beti zoro moduan erakutsi izan dizkigute sorginak, eta guk emakume aurrerakoiak zirela erakutsi nahi izan dugu», azaldu du Eli Nosellas Alurr taldeko zuzendariak.

Suak presentzia handia du ikuskizun honetan. Hasieran pertsonei sentiarazten dien beldurra irudikatzen dute, batik bat naturako elementu horrek lehen zituen konnotazio negatiboak. Amaieran aldiz, Nosellasen hitzetan: «Itzaltzen ez den sua, itxaropenaren eta indarraren sinbolo gisa aurkeztu nahi izan dugu».

Sua emanaldiaren sorrera

Lehen aldia da Alurr dantza taldeak film baten moldaketa egiten duela. Taldekideek aspalditik nahi zuten, dantzaz gain antzerkia edota istorioren bat kontatzen zuen ikuskizunen bat prestatu. Alurr-eko kide batzuek Eneko Aritzaren Lagunak kultur elkarteak eginiko Sua filmean parte hartu zuten, eta haren moldaketa egitea bururatu zitzaien. Hala ere, hiru orduko gidoia egokitzeko zailtasunak izan zituzten. Hori horrela, filmean kontatzen zen istorioaren sustraia hartzea erabaki zuten; azpian zegoen mezua igortzea koreografien bidez. Eli Nosellasek azaldu duenez: «Zineman irudia eta ahotsa dituzu istorio bat azaltzeko, gure kasuan aldiz zailagoa da, guztia irudikatu beharra daukazu». Komunikatzeko erabili duten baliabideetako bat jantziena izan da. Ramon Garciak egindako lanari esker, ikuslegoak erraz ezberdinduko ditu jauntxoak eta herritarrak.

«Aspalditik genuen proiektu propio bat egiteko gogoa», azaldu du Nosellasek. Hala, koreografiak sortzeaz Edu Muruamendiaraz eta Katixa Perea arduratu diren arren, talde osoak hartu du parte sormen lanean. Euskal dantza tradizionaletan oinarritzen diren arren, berrikuntzak gehitu dituzte. Koreografien bidez, taula gainean, jauntxoen eta herriaren arteko gatazka islatzea lortu dute. Eli Nosellasek borroka hori nola antzeztu duten azaldu du: «Filmean ez bezala, guk ez ditugu irabazleak eta galtzaileak definitu, interpretazio irekia eman nahi izan dugu».

Alurr dantza taldearen ikuskizun gehienetan musikaz zuzenean gozatzeko aukera eskaintzen den arren, Sua proiektuarekin hori ez da posible izan. Hasiera batean musika konposatzea pentsatu bazuten ere, azkenik Oreka TX, Kepa Junkera, Javier Tejedor, Alboka eta Tomas San Miguelen doinuak dantzatuko dituzte emanaldian.

Alurr dantza taldea

1995ean ekin zion Alurr dantza taldeak bere ibilbideari. Jose Luis Zubeldiari Ibarran dantza ikastaro bat ematea eskaini zioten, eta, hark izan zuen arrakasta ikusirik dantza taldea sortzea erabaki zuen herriko talde batek. 13 urte hauetan inguruko herrietara zabaldu dira: Legorreta, Zaldibia, Zizurkil, Berastegi, Berrobi, Altzo, etab. Ikuskizunak eskaintzeaz gain, dantza eskola moduan ere lan egiten du.

Une honetan Sua proiektuan buru-belarri dabiltzan arren, Alurreko kide batzuk beste emanaldi batzuk prestatzen ari dira.