Sormenetik asko izango duen 'A Tempo' astea

Hondarribiko Musika eta Dantza Eskolak mimoz eta ilusio handiz prestatu du beste urte batez ‘A Tempo’ astea. Datorren astelehenetik larunbatera hainbat pedagogo, artista, musikari eta sortzailek tailer eta saio bereziak eskainiko dituzte.

Gaur goizean egin dute aurkezpen ekitaldia. Esther Barandiaran Hondarribiko Musika eta Dantza eskolako zuzendari pedagogikoa, Oaia Peruarena artista eta Juan Luis Silanes kultur zinegotzia izan dira bertan.

Oaia Peruarena artista beratarra izan da aurtengo VI. edizioko kartelaren egilea. Azaldu duenez, mugimenduan eta kolorean zentratu da obra sortzerako garaian: “Hori da dantza eta artea niretzat, orokorrean mugimendua da. Hori islatu nahi nuen bertan, gauza dinamiko hori, mugimendu bizi hori. Dantzan aski argi ikusten da, baina musikan ere hori da dena. Eta gero kolorea dago. Niretzat musika irakurri daiteke koloreekin”.

‘A Tempo’ kartelaren egilearen lana jasotzearekin batera hasten da. Hala adierazi du eskolako zuzendariak: “Oparitxo bat bezala sentitzen dugu. Familiek, irakasleok eta bertaratu nahi duten guztiek jasotzen dugunean horrelako lan bat eta egileak azaltzen duenean guretzat apropos egin duela, uste dut denek jasotzen dugula oparitxo bat bezala”.

Gainera, mota honetako ekintzak oso aberasgarriak dira Barandiaranen ustez, beste begirada bat eta beste egiteko erak izatea ahalbidetzen dutelako. Nahi edo nahi gabe, sorkuntza eta sormena izango dira ‘A Tempo’-ren seigarren edizio honetako muina. Datorren astean sortzaileak etorriko dira eta haiekin gogoetak partekatzeko aukera izango dute.

Egitaraua

• Amets Arzailusekin gazteek aukera izango dute partekatzeko sormenaren prozesua nolakoa den. Saio irekia izango da.
• Urko Arozena txistulari eta perkusionistak ‘Denon aurrean gure onenean. Musika eta emozioak’ solasaldia eskainiko du. Egunerokotasunean emozioak nola kudeatu ikasteko. Solasaldi irekia izango da.
• Marta Bocos pedagogo musikariak Musika Heziketa Goiztiarra taldeko haurrentzat saio berezia eskainiko du. ‘Negua’ ipuinaren bidez.
• Gaizka Sarasolak ‘Txoriak maite zituen amona’ ipuin musikatua eskainiko die 4, 5 eta 6 urteko ikasleei.
• Musika Hizkuntzako 1. eta 2. mailako ikasleek ‘Abestuz, dantzatuz, sortuz’ saioa landuko dute Sofia Chaconen eskutik.
• Kultura irakasgaiko 1. eta 2. Kurtsoko Froga taldeko 1. eta 2. kurtsoko ikasleek Oiartzungo Mecca Recording Studio grabaketa estudioa bisitatuko dute. Era honetan, grabaketa prozesua nola egiten den ezagutzeko aukera izango dute Mikel eta Igor Ezeizaren eskutik.
• Dantza Klasikoa eta Euskal Dantzako ikasleentzat ‘Orri txuria’ tailerra eskainiko du Eider Romero dantzariak. Dantza garaikideak sorkuntza gaitasunean nola laguntzen duen erakutsiko du.
• Instrumentaleko 6. kurtsoko eta 3. mailako ikasleek ‘Aprendiendo a hablar con el instrumento. Una introducción al blues’ tailerran parte hartuko dute Miguel Arribas saxofonistaren eskutik. Ikasleek bluesaren oinarrizko kontzepuak ikasiko dituzte.
• R. Rachmanioven jaiotzaren 150. urteurrenaren harira, ikasle helduentzako ‘Escucha guiada del 2. Concierto para piano y orquesta’ saio berezia.
• Zeharkako txirula gelako ikasleek ‘Creadoras’ zikloaren baitan masterclass bat jasoko dute.
• Piano ikasle helduek ‘En común’ tailerra jasoko dute Esther Barandiaran irakaslearen eskutik. Pianoari lotutako ikasketak eta hainbat alderdi partekatuko dituzte. Bukaeran hainbat emakume konpositorek sortutako lanak eskainiko dira. Azken hau saio irekia izango da.
• Astea borobiltzeko larunbatean (hilak 11) goizeko 11:00etan Portuko elizan emanaldi berezi bat eskainiko dute espezialitate desberdineko ikasleek.