Hemen zaude: Hasiera Hemeroteka Sokaren lihoa iruten

Dokumentuaren akzioak

Sokaren lihoa iruten

'[Sok]2' ikuskizuna estreinatuko du gaur Kukai dantza taldeak, 'Soka' proiektuaren bigarren emaitza

Egilea
Ainara Rodriguez
Komunikabidea
Berria
Tokia
Donostia
Mota
Albistea
Data
2010/03/12

Mugimendu batzuetan leun eta besteetan zakarren bitartez, euren arteko harremanak garatu eta errotuko dituzte dantzariek; apurka arropak soinean jantziz joango dira, eta, azkenean, taula gainean eskutik helduta, guztiek bat egingo dute. «Bateratua dagoen gizartearen argazkia» da erakusten den batasuna, Kukai dantza taldeko kide Jon Maiaren hitzetan.

Iaz abiatutako Soka obraren parte da [Sok]2, baina ez haren bigarren zatia, proiektuaren bigarren emaitza baizik. «Uste genuen bazegoela aurreko lanetik nondik garatu, eta horregatik ekin genion lan honi». Ohi moduan, dantzari gisa baino gehiago, koreografo lanetan aritu da Maia. Pantxika Telleria izan du lagun zeregin horretan. Maiak berak gogoratu duenez, Telleriak ezin hobeto deskribatzen du obraren funtsa: «Berak dio hau ez dela eleberri bat, ez dela hasi eta amaitzen den istorio bat; poesia liburu batekin alderagarriagoa dela esaten du».

Aurreko aldian legez, oraingoan ere soka da lanaren hari gidaria. Sokadantza tradizionalean inspiratuta dago, baina ez da haren erreprodukzioa. «Dantza hori oroitarazi eta, era berean, gauza asko iradokiko ditu», dio Maiak. Sokak, lanak aurrera egin ahala, rol bikoitza jokatuko du; ikusleek begi biez ikusteaz gain, sinbolikoki ere, dantzarien arteko harremana erakustera etorriko da.

Dantza eta musika, biak bat

Obra, dantza emanaldia ez ezik, musika ikuskizuna ere bada. Iñaki Telleriarena da musika originala. Hark eman zien Maiari eta Telleriari, hain zuzen, lan hau abiatzeko aitzakia: «Hark egin zuen ikuskizun berrirako proposamena. Musika ederra izateaz gain, lan honetarako egokia ere bada, garapenarekin ederki josten dena», zehaztu du Maiak.

Biak ala biak, batera sortu diren formak dira, bata bestea elikatuz joan direnak. Perkusioaren, harparen eta kontrabaxuaren doinuek iruten dute, zehazki, sokaren lihoa. Dantzariekin batera zuzenean aritzen dira musikariak taula gainean, Maiaren aburuz, «ingurugiro ezin hobea» emanez lan osoari.

'[SOK]2'

Estreinaldia: Gaur, 21:00etan, Bilboko Campos antzokian.

Martxoaren 27an: 19:00etan, Miarritzeko Kasino antzokian.

Maiatzaren 18an: 20:00etan, Errenteriako Kultur Etxean.

Dokumentuaren akzioak