Edukira salto egin | Salto egin nabigazioara

Tresna pertsonalak
Hemen zaude: Hasiera Hemeroteka Sei estreinaldi erabateko hartuko ditu aurtengo BAD jaialdiak

Dokumentuaren akzioak

Sei estreinaldi erabateko hartuko ditu aurtengo BAD jaialdiak

Idoia Zabaletaren eta Filipa Franciscoren lan berria estreinatuko dute festibalean: 'Bicho, eres un bicho'

Egilea
Garikoitz Goikoetxea
Komunikabidea
Berria
Tokia
Bilbo
Mota
Albistea
Data
2009/10/27

Egun gehiago, eta leku gehiago. Ohiko aretoetan ez ezik, emanaldiak izango dira aurten BBKren kultur aretoan, EITBren egoitzan, Kafe Antzokian, Zabalguneko merkatuan, Hika Ateneo aretoan, Artelan Berreginen Museoan eta Vanguardia arte galerian. Eraikin bitxiagoak ere erabiliko dituzte: Zubiarte saltoki guneko aparkalekua eta Zorrozaurreko Beta lantegi zaharra.

Zubiarte saltoki guneko aparkalekuan, El ser humano perfecto izeneko performance-a egingo dute azaroaren 1ean. Lehenbiziko aldia izango da Euskal Herrian ematen dutena. Zorrozaurren, berriz, Fuera de la fábrica Beta lana emango dute, Itineris Apur Bad atalaren barruan. Bilbon ibilaldia egitea proposatzen du Nilo Galego espainiarraren lanak, Arriaga antzokian hasi eta Beta lantegian amaitzen dena. Autobusean egingo dute bidea.

Erabateko sei estreinaldi

Estreinaldiak dira BAD jaialdiaren ezaugarri nagusietako bat. Aurten, hamahiru lan emango dituzte lehengoz Euskal Herrian, eta sei erabateko estreinaldiak izango dira. Guztietan dago euskal herritarren bat tartean. Bihar, Arriaga antzokian, Acebeda hirutarako balleta emango dute; eskeletoak izango dira dantzari protagonistak. Etzi, Vanguardia galerian, obrari buruzko performance-a egingo du Mabi Revueltak. Lanaren inguruko erakusketa zabaldu zuten iragan larunbatean, Vanguardia galerian bertan. Azaroaren 8ra arte egongo da ikusgai.

Idoia Zabaletak eta Filipa Franciscok Bicho, eres un bicho lana estreinatuko dute larunbatean, Artelan Berreginen Museoan. Performance berezia izango da, bankete eta guzti izango baitute; Andoni Luis Aduriz eta Javier Bergara sukaldariek prestatuko dute. Sukaldaritza eta artea uztartu nahi izan dituzte gisa horretara. Gainera, lanari buruzko liburua ere argitaratu dute. Obra eman aurretik aurkeztuko dute hura, BAD jaialdian bertan.

Bilboko Trashumantes y la Novia antzerki konpainiaren Leyendas urbanas lana estreinatuko dute azaroaren 4an, Bilborock aretoan. Crónica de la noche abierta lanaren ondorengo atala da; 2007ko BAD jaialdian eman zuten hura. Beatriz Gazquezen Out dantza ikuskizuna emango dute La Merced aretoan lehenbizikoz. Atzera-aurrerak nagusi dituen lana da. Azaroaren 6an, Juanjo Otero aktorearen eta Sala Triangulo taldearen Hamster antzezlan berria emango dute EITBren egoitzan. Gizakien eta etxekotutako animalien desberdintasunak izango dituzte hizpide.

Erabateko estreinaldiak ez izanagatik ere, euskal herritarren lan gehiago ere emango dituzte jaialdian. Besteak beste, Kapzuloa instalazioa, Dantzan bilaka ikuskizuna eta Diktat antzezlana. Hala, Kultura zuzendari Iñaki Lopezen esanetan, BAD jaialdia euskal herritarren lanak zabaltzeko plaza izatea nahi dute. «Gure bokazioa da Euskal Herriko artistentzat irteera oholtza izatea, eta inguruko lanik berritzaileenei aukera ematea jendaurrean erakusteko».

Nolanahi ere, kanpotarrak ere izango dira BAD jaialdian. Besteak beste, Espainiatik, Herrialde Katalanetatik, Frantziatik, Belgikatik, Portugaldik, Italiatik eta Suitzatik etorriko dira artistak. Antolatzaileek Vicente Arlandisen parte-hartzea nabarmendu dute. «Urte asko generamatzan haren atzetik, eta bi espektakulurekin etorriko da», esan du BADeko zuzendari Fernando Perezek.

Bilboko jaialdiaren karietara, bestelako ekintzak ere izango dira datozen egunetan. Bermeon, Arrigorriagan eta Durangon ere eskainiko dituzte antzerki eta dantza emanaldiak, BAD Bizkaia Antzerkia Dantza zikloaren barruan. Bilboko Kafe Antzokian, berriz, kontzertua emango du Filastine & McNova taldeak, Nadya Tribal Dancers dantza taldearekin batera.

Topaketak, mintegiak eta gisa horretakoak ere izango dira. Antolatzaileek IETM Informal European Theatre Meeting jardunaldia azpimarratu dute. Nazioarteko 50 programatzaile baino gehiago izango dira Bilbon.

Dokumentuaren akzioak