San Rokeri dantzan

Bihar, ezpata dantza eginen dute Deban, eta, aurten, emakumeek ere parte hartuko dute gizonekin batera

Iaz hartu zuten erabakia, eta modu sinboliko batez eman zuten horren berri. Baselizaren aurrean dantza buruzagiak ezpata eskaini zien taldeko emakumeei. Hala, aurten 1967tik ikusi gabeko irudia izanen da Debako kaleetan, urte hartan emakumeek ere parte hartu baitzuten ezpata dantzan. Ez dago dantza parekidea egin izanaren bestelako daturik.

Ordutik, gizonezkoak bakarrik dantzatu dira, baina, dirudienez, hemendik aurrera, ez da horrela izanen. 1967an ez bezala, oraingoan emakumeen parte hartzea ez da soilik urte bakarrera mugatuko. Ezusterik ez bada, Deban emakumeak eta gizonak elkarrekin dantzatuko dira heldu diren urteetan ere.

Egun osoko jarduera

Goizean goiz jaikiko dira dantzariak bihar. San Rokeren irudiari harrera egiteko prest egon beharko dute elizaren atarian 09:30ean. Han dantzatu ondoren, baselizara abiatuko da segizioa, eta mezaren ondotik, hango zelaian ezpata dantza eginen dute berriz ere. Bukatzeko, herrira itzuliko dira Plaza Zaharrean San Rokeren irudia dantzekin agurtzeko. Foruen plazan eginen dute azkenengo dantza: aurreskua.

Urtero abuztuaren 16an ezpata dantza egiten dute Gure-Kai dantza taldeko kideek. / OIER ARAOLAZA / DANTZAN