Hemen zaude: Hasiera Hemeroteka Plazako dantza izango da Nazioarteko Trikitixa Jaialdiaren ardatz nagusia

Dokumentuaren akzioak

Plazako dantza izango da Nazioarteko Trikitixa Jaialdiaren ardatz nagusia

Trikitixaren urteko ekitaldi berezienetakoa larunbatean ospatuko da Donostiako Viktoria Eugenia antzokian

Egilea
Naiara Elola
Komunikabidea
Berria
Tokia
Donostia
Mota
Albistea
Data
2008/11/20

Larunbatean 19:00etatik aurrera, atzerriko zein euskal musika eta dantza taldeez gozatzeko aukera izango da. Europako hiru taldek eta Euskal Herriko beste hiruk hartuko dute parte jaialdian.

Horietako bat Irlandako Spraoi taldea izango da. Azken aldian mundu osoan zehar eskaini dituzte Irlandako dantza eta musika tradizionala uztartzen dituzten emanaldiak. Larunbatean Irlandako musika pieza tradizionalak eskainiko dituzte, eta hango dantza ezberdinez ere gozatu ahal izango da Donostiako antzokian.

Menta Fresca Dantza talde italiarra izango da bigarren talde atzerritarra. Campania eta Puglia eskualdeetako tradizio herrikoiak uztartzen ditu. Bi lurraldeok mende luzetan zibilizazio grekoaren eragina izan dute, eta gaur arte iraun duten tarantelak eta tammurriatak, esaterako, ezagutu ahal izango dira, dantza sentsual biak ere.

Kanpotik etorriko den hirugarren taldea Pandeiro Furado Galiziako laukotea da. Horiek arduratuko dira muñeira eta jotak jotzeaz, panderoa, perkusioa eta gaita lagun. Nahiz eta eskusoinu diatonikorik ez erabili, panderoa ezinbestekoa da talde horren ikuskizunetan.

Euskal ordezkariak

Bestaldee, Lapurdiko Zpeiz Mukaki izango da euskal taldeen ordezkarietako bat. Euskal dantzari berritzaileak eta txaranga rockero bat batzen ditu talde gazteak. Hamabost lagunek osatzen dute eta dantza tradiziotik gaurkotasunera eramatea da.

Bigarren euskal taldea Bizkaiko Arantzarte dantza taldea izango da. Igorren sortu zenetik, bidaia eta jaialdi askotan parte hartu dute. Arratiako eta Gorbeialdeko herri gehienetan dantzatutakoak, dantzari jarraitzen dute gaur egun ere. Larunbateko Trikitixa Jaialdian, Arratia inguruko errepertorioa eskainiko dute musika eta dantzaren bitartez egingo duten erakustaldian.

Azkenik Gipuzkoako erromerietan dantzan aritzen diren hainbat lagunek osatutako talde bat ariko da; sasi dantza eskainiko dute, besteak beste. Landa eta baserri ingurunean garatu den fandangoa dantzatzeko modu berezia da sasi dantza.

Plazako dantzarien omenaldia

Garai batean, mandio eta ganbaratan ezkutuan egiten ziren erromerietan garatu zen estiloa da larunbatean ariko diren dantzariena. Partitura eta dantza eskoletatik aparte jaiotako bertsio berriak dira.

Hala, Gipuzkoako hainbat eta hainbat erromeritan dantza plazer soilez dabilen seikotea osatu dute jaialdirako. Trikitixa eta panderoarekin Alkorta anai-arrebak ariko dira larunbateko jaialdian. Sei lagun horiek egingo duten saioaren bitartez, plazako dantzariak omendu nahi dituzte. Agurtzane Aizpuru Euskal Herriko Trikitixa Elkarteko idazkariaren hitzetan, «plazan egiten diren dantzak igandero antolatzen diren erromeriei esker daude bizirik». Hori aitzakiatzat hartuta, jaiero erromeriak egiten diren herri eta auzoak ere ekarriko dituzte gogora.

Sarrerak Viktoria Eugeniako txarteldegian, Antzokia Zaharrean, Servikutxa, Telekutxa eta www.kutxa.net Interneteko helbidean izango dira salgai larunbata bitarte. Ekitaldia amaitu ondoren, afaria egingo da Lasarteko (Gipuzkoa) Goiegi jatetxean. Han izan nahi duenak trikitixa@trikitixa.net helbidean egin behar du erreserba. 943-83 28 28 eta 657-79 42 17 telefono zenbakietara ere deitu daiteke eserlekua eskuratzeko.

Dokumentuaren akzioak