Edukira salto egin | Salto egin nabigazioara

Tresna pertsonalak
Hemen zaude: Hasiera Hemeroteka Petra von Kanten bidaia

Dokumentuaren akzioak

Petra von Kanten bidaia

Kritika, Donostiako Antzerki Feria

Egilea
Agus Perez
Komunikabidea
Berria
Mota
Kritika
Data
2007/07/13

Donostiako Antzerki Ferian ikusi dugun bertsioa Madrilgo Craneos de Yorick konpainiak prestatu du, eta dudarik gabe esan daiteke oso proposamen interesgarria plazaratu dutela. Hasteko eta behin, testuaren hautaketa aipatu behar dugu, egileak egoeraren disekzio klinikoa egiten baitu, hiru pertsonaia nagusien arteko tirania-harremanak gordin azaleratuz eta inguruko beste hiru pertsonaiak makinaria dramatikoaren ezinbesteko osagai bezala erabiliz. Argumentuan zehar, Petraren botere nahiak talka egingo du Katrin Thimm-en gaztetasun axolagabearen kontra, gutxien espero duenean gainera, eta orduan are nabariagoa izango da Marlene neskamearekin duen esklabotasun harremana, zenbait momentutan Genet-en Neskameak gogorarazten diguna.

Jose M. Echek eta Miquel Insuak atondutako dramaturgia eszenikoan hiruzpalau besaulki lerrok betetzen dute agertokia, eta benetako ikusleen irudia eszenako atzealdean proiektatzen da noizean behin, fikzioaren eta errealitatearen arteko lotura areagotzeko. Bestetik, sormen handikoa da objektuen erabilera subliminala, eta horrek asko errazten du ekintzaren erritmoa. Horretaz gain, albo bateko bideokamera eta lehen lerroko telebista pantaila Fassbinderren filmean lehen planoko irudiei emandako garrantziaren ondoriotzat har ditzakegu. Antzezpenei begira, primeran egon dira sei emakumeak, une batzuetan apalegi ibili diren arren, batez ere ahotsaren proiekzioari dagokionez. Hori kenduta, baina, oso zapore intentsua utzi digu Petra von Kanten itzulerak.

Matxalen Bilbaoren Haiku 4 dantza lana, aldiz, batere zaporerik gabea izan da. Denok uler dezakegu koreografoek beti-beti zerbait esateko ez izatea, baina kasu horietan zintzoena da ezer ez plazaratzea. Posiblea da kontrako kasua ere, baina orduan mugimenduaren diseinu interesgarrian eta haren kalitate ukaezinean oinarritu beharra dago. Esandako baldintzetatik bat bera ere ez da bete Dantzarako Plataforman aurkeztutako pieza honetan.

Obrak eta konpainiak: Las amargas lagrimas de Petra von Kant (Craneos de Yorick); Haiku 4 (Matxalen Bilbao).
Eguna: Uztailak 11.

Dokumentuaren akzioak