Pauso berriak emateko sasoia

Obra garaikideak ez ezik, pieza klasiko, neoklasiko eta bestelakoak ere izango dira Bilboko Dantzaldian, aurrerantzean

Dantzaldiaren jarraitzaileek esku biekin zenbatzen dituzte dagoeneko jaialdiaren urteak. Dantza garaikidea ardatz duen Bilboko jaialdiak 10 urte bete ditu, eta aldaketak egiteko «une interesgarri eta egokia» dela erabaki dute antolatzaileek, hots, La Fundicion aretoak eta Bizkaiko Foru Aldundiak. Udaberrian egingo dute aurrerantzean, udazkenean barik. «Urtearen azkena sasoi ederra da dantza jaialdia antolatzeko, baina bada arazo bat: eskaintza handia izaten da garai horretan, gehiegizkoa. La Fundicion aretoarekin berarekin lehiatzen da Dantzaldia sasoi horretan», azaldu du Laura Etxebarriak, La Fundicion aretoko zuzendari eta Dantzaldiaren arduradunak.

Hala bada, apirilean eta maiatzean egingo dute aurten Dantzaldia. Eta obra garaikideak ez ezik, beste estilo batzuetako piezak ere erakutsiko ditu. Apirilaren 19tik maiatzaren 31ra denak ere. «Hamar urtetan, dantza garaikidea normalizatzeko urratsak egin ditugu, eta uste dugu Bilboko ikus-entzuleengan eragin dugula, bere egin duela dantza garaikidea nola edo hala». Bestelako moldeei segituta sortutako lanak eskaintzeko garaia dela ebatzi dute, horrenbestez. Ikuspegia zabaltzeko, eta bestelako estiloei tartea egiteko: dantza klasikoari, neoklasikoari, hip-hopari...

Hitzaldiak antolatuko dituzte, orobat, jaialdian izango diren sortzaile eta ikus-entzuleen arteko lotura indartzeko asmoz. Eta mintegiak ere egingo dituzte, hemengo koreografo eta dantzari gazteen trebakuntza sustatzeko helburuarekin. Izan ere, aurtengo egitarauak ardatz bi izango ditu: hemengoa eta atzerrikoa. Oinarri bi horiek uztartuko ditu 10. Dantzaldiaren egitarauak.

Eva Yerbabuena

Flamenkoa dantza garaikideko osagaiekin uztartzeak egin du ezagun Eva Yerbabuena mundu zabalean. 1970ean, Alemanian jaio zen arren, Espainiako hegoaldean, Andaluzian hazitakoa da Yerbabuena. Umetatik agertu zituen dantzarako trebezia eta interesa, eta bere kabuz eman zituen lehendabiziko pausoak. 1998an sortu zuen bere konpainia, eta, harrezkero, koreografia ugari sortu ditu dantza tradizionala garaikidearekin uztartuz, flamenkoa mugara eramanez eta adierazpide berritzaileak sortuz. Bilboko Euskalduna jauregian, orain artean sortutako solo guztien bilduma eskainiko du Yerbabuenak, apirilaren 19an. Jose Valencia, Pepe de Pura eta Jeromo Segura flamenko kantariek lagunduko dute oholtzan. Emanaldi honekin hasiko da, hortaz, Dantzaldia.

Lorraneko Balleta

Frantziako Lorraneko Balletak hiru pieza aurkeztuko ditu Dantzaldian: Steptext, Brokenman eta Les Ombres d'une Guerre Sans Nom. William Forsythe koreografo ezagunak sortutako lana da Steptext. Antzerkiaren mugak hausten ditu, antzezlanen egitura gaindituz. Lau dantzariren mintzaldi musikal, eszenografiko eta espaziala erakusten du. Gregory Beaumont, Mikael Conte, Fabio Dolce eta Nina Khokhamek interpretatuko dute Steptext.

Stephen Petronioren Brokenman koreografia, bestalde, Dmitri Domojirovek interpretatuko du. Dantzaria bat-batean igaroko da bihotza gelditzerainoko laztanetatik estutzerainoko mugimendu hautsietara. Mutur batetik bestera ariko da, beraz, Domojirov. Azkenik, Herve Robberen Les Ombres d'une Guerre Sans Nom askoren artean eskainiko dute. Lorraneko Balleta maiatzaren 3an izango da Euskaldunan.

Polaroiska

Euskal Herriko zenbait koreografok sortutako taldea da Polaroiska. Alaitz Arenzana, Maria Ibarretxe, Jorge Lastra eta Izaskun Santamariak osatzen dute. Dantzaldian, Natxo Montero, Arrate Etxebarria eta Amaia Pascualekin batera emango dute Animalia, topaketa eta autopistei buruzko oharrak lana. Zein tokitan eskainiko duten ez dute aurreratu, ikusleak ezin du-eta azkenera arte jakin. Zinema esperimental, bideo dantza eta performance-aren arteko esperientzia izango da. Bukatzean, lan horren parte-hartzaile sentituko da ikuslea, bizitako horren interprete modura. Maiatzaren 8an, 9an eta 10ean egingo dute lana. Polaroiskaren obra horretan parte hartu nahi dutenek antolatzaileekin jarri behar dute harremanetan, non lotu zehazte aldera (info@lafundicion.org).

Lucia Lakarraren eskutik

Municheko Operako Balleteko dantzari nagusia da Lucia Lakarra (Zumaia, Gipuzkoa, 1975). Urte mordoa daramatza Euskal Herritik kanpo lanean. Hala, urte hauetan guztietan ezagututako dantzariak ekarriko ditu Dantzaldira; puntako profesionalak, herri askotakoak. Lakarrak gidatuko du saioa, eta denen artean balletaren historian mugarri izan diren lanak interpretatuko dituzte. Romel Frometa Kubako Balleteko dantzari nagusia, Marlon Dino Municheko Operako Balleteko bakarlaria, Marian Walter Berlingo Operako dantzari nagusia, Yat-sen Chang English Balleteko dantzari nagusia, Eva Suarez Kubako Balleteko bakarlaria, Daria Sukhorukova Municheko Operako Balleteko bakarlaria, Iana Salenko Berlingo Operako dantzari nagusia eta Crystal Costa English Balleteko bakarlaria ariko dira Lakarrarekin batera, Euskalduna jauregian, maiatzaren 19an.

Saskia Holbling

Obra apurtzailea aurkeztuko du Saskia Holbling austriarrak (Viena, 1971) Guggenheim museoko auditorioan, maiatzaren 27an. Bideo batekin (Doron Goldfarb) eta musikarekin (Heinz Ditsch) jokatuko du Holblingek, ikus-entzuleak inguratuko dituen espazioa sortzeko. Izotzaz sortutako paisaietan barrena bidaiatuko du. Batzuetan gorputza paisaia horretatik kanpo geratuko da; besteetan, ordea, atzealdearekin bat egingo du Holblingek, ia desagertzeraino.

Frankfurtetik Bilbora

Sorterria atzean utzita, Frankfurten elkarrekin lan egiten duten hiru dantzariren bakarkako piezak ikusteko aukera izango da Dantzaldian, maiatzaren 31n. Euskal Herrian sortuak dira Jone San Martin eta Amancio Gonzalez; Inma Rubio, berriz, Herrialde Katalanetakoa da. William Forsytheren konpainian lan egiten dute hirurek, Alemanian. Bilbon, sona handiko koreografo horrek diseinaturiko obra bat aurkeztuko dute: The Vile Parody Of Address. Bakarka emango dituzten lanak berriak izango dira, estreinaldiak: Derivado (San Martin), Sin-King In Me (Gonzalez) eta Vision Divided (Rubio).