Hemen zaude: Hasiera Hemeroteka Ostiralean, 150 dantzarik, musikarik eta bertsolarik heien sustengua ekarriko diete euskal presoei. Artearen jaia izango da

Dokumentuaren akzioak

Ostiralean, 150 dantzarik, musikarik eta bertsolarik heien sustengua ekarriko diete euskal presoei. Artearen jaia izango da

Dantzaz, euskal herrirat!

Komunikabidea
Matraka
Mota
Erreportajea
Data
2006/04/26

Dantzaz, euskal herrirat! Antolatzaileen erranetan, "kalitatezko emanaldi bat izanen da! Leku aproposa, emanaldi landuak eta sorkuntza arras ezberdinak" azaldu digu Rozkok, Basusarriko dantzariak eta ekitaldiaren antolatzaileak.

Gaualdia, iluntzeko zortziak eta erditan hasiko da dantza agerraldiarekin. Orotarat zortzi dantza taldek eskainiko dute heien sorkuntza: Hazparneko Elgar Oinka, Lekorneko Urtxoko Xoriak, Garaziko Garaztarrak, Maritzuli Konpainia, Miarritzeko Oldarra, Poporen alde egindako dantza, Donibane Lohitzuneko dantzariak, Arbonako Primadera.

Hazparneko Elgar Oinka taldeak lehen aldiko aurkeztuko du bere Uztai Ttiki Dantza bermoldatua. Ohiturazko koregrafia eta urratsetatik abiatuz, adaptazio berezi eta rokero batean murgilduko dira taldeko zortzi mutilak. Lekornekoek, kultura biziaraztearen eta gazteen gora beherak jorratuko dituzte. Garaztarrek aldiz Hip Hop eta Euskal dantzen arteko nahasketa eskainiko dute. Claude Iruretagoineak zuzentzen duen Maritzuli konpainiak, Kutx ala Pil bere azken agerraldiaren pasarte bat eskainiko du, zamaltzainen pasartea hain zuzen ere. Koldo Zabalak bere Gernika baletaren parte bat ere emanen du; Azken Oihua deitzen da hau. 2003-an, Baigorri, Basusarri, Donibane Lohitzune eta inguruetako gazte batzuek, Popo Larreik-ko militante desagertuaren alde dantza bat asmatu zuten; hau ere ikusgai izanen da. Begiraleak dantza taldearen 70. urtemugaren karietarat egin zen sorkuntza ere taularatuko dute Donibane Lohitzuneko dantzariek. Eta bukatzeko, azken uneko eranskina, Arbonatarrek Arin Arin bizi eta berria emanen dute.

Baina agerraldi bat ez da idatziz aurkezten, oholtza gainean ikusi behar da. Hortarako gomita luzatua da Makean. Ondotik, erromeria bat izanen da, talo, txaranga eta kontzertu batek alaiturik. Eta oraindik erakargarriagoa izateko, sartzea biziki prezio merkean finkatu dute antolatzaieek: 6 euro edo 8 sustenguz. "Jakinez agerraldi bakar bat ez dela sekulan 20 euro baino merkeago, eroa izan behar litzateke 8 agerraldi ez etortzea ikusterat... Euro bat talde bakotxa ikusteko!!!" harritzen da Rozko bera.

Askatasuna presoen sustengu elkartea "pozik eta itsaropentsu" agertu da eta "elkarlana errexki onartu" dutela erran digu elkarteko kide den Markotxek. "Pertsona ezberdin askok heien elkartasuna adierazten dute presoen alde eta hori keinu ona da, benetan beharra delako", gehitu du elkarteko kideak. Apirila eta maiatza artean, hainbat ekimen izan dira espetxeratuen alde Lapurdi, Baxe Nafarro eta Zuberoan. Eta "mobilizazioak aintzina segituko du eta areagotuko da" abisatu digu Markotxek.
Hori horrela gertatuz gero, hemendik laister lan haundia izanen dute larunbatean dantzatuko dutenek: ehunka eta ehunka ongi etorri izanen direlarik Euskal Herrian, Aurreskuak dantzatu beharko baitira askatu guzien parean...

«Gurean egiten
diren lanak
ezagutarazi
nahi ditugu
emanaldian»


Antton Moustirats

antolatzailea


A Noiztik zabiltz dantza munduan

Dantza 8 urtetan hasi nuen nere klaseko lagunak ikastolako aire-hartzeetan dantzatzen ikusten nituela eta. Honek eman zidan dantzatzeko gogoa. Basusariko Lapurdi dantza taldean hasi nintzen. Lehenik taldeko dantzari helduagoak nituen erakasle eta ondotik Patxi Perez. Eta dantza munduan mutilak eskas direnez, hainbat talderekin ibili naiz projektu batzuen inguruan sorkuntza, bidaia….

B Zer ekartzen dizu, zuri, dantza egiteak

Lehenik eta behin, dantza plazerrarentzat egiten dut. Basusarriko taldean mutil guziak oso lagunak gira eta guretzat dantza elkartzeko aitzaki bat zen. Beraz bereziki dantza lagunekin ongi pasatzeko egiten nuen, bestari eta bidaiatzeari ere lotua baita. Gero izertze on baten egiteko ere, dantza kirola baita. Eta azkenik, euskal dantza gure herriaren ondarea da; garrantzitsua da nere aburuz gure ohituretaz jabetzea eta kultura bizirik atxikitzea.

C Nola etorri zitzaizuen emanaldi horren antolatzeko ideia
Ikusgarri horren antolatzeko gogoa etorri zitzaigun ohartu ginelarik azken urteetan Ipar Euskal Herriko dantza talde andana batek sorkuntzak egin zituela baina ez zuela hainbeste paradarik izan horien hedatzeko. Egia da aukerak eskas direla herriko plazatik ateratzeko eta publiko zabal baten aurrean dantzatzeko. Baina ezin genituen hain lan ederrak aurkeztu gabe utzi. Emanaldi horren bidez lan guzi horien berri eman nahi dugu ahal bezain bat pertsona ezberdinek ikus eta goza ditzaten.
Bigarren denbora batean, ikusgarri hori proiektu baten alde bideratu nahi izan dugu. Ez ginuen ikusgarri bat egin nahi ikusgarri baten egiteko. Dantza adierazpen molde gisa ikusten dugu eta Askatasuna erakundeko kideekin bildu ostean, presoen sustenguz egitea hautatu ginuen.

D Zaila izan al da hainbeste dantzari aldarrikapen baten inguruan elkartzea, hau da presoen alde
Harrigarria badirudi ere eta lehen aldia izanik ere, ez da hain zaila izan! Dantza taldeen gana jotzean eta projektua azaltzean, jendeak bat egin du. Erran beharra dago presoen aldeko dinamika geroz eta zabalagoa dela eta ainitzek bat egiten dutela presoen egoeraren hobetzeko aldarrikapenarekin, bereziki une hauetan, eta horrek ere asko lagundu du.

E Zer du berezi agerraldi honek Nola emango zenieke irakurleeri etortzeko xedea
Emanaldi honek hiru helburu ditu: lehena, azken bi urteetako zortzi sorkuntza berriz plazaratzea eta ondorioz ikusi ez duten pertsoneri ikusteko aukera bat ematea. Gero euskal kultur eragile gisa, aldarrikapen bat kaleratzea: mezu zehatza eta azkarra hedatzera goaz: “150 dantzarik eta 8 dantza taldek, dantza ikusgarri bat eskaintzen diete 700 presoeri”! Eta azkenik, publiko zabala eta ugaria bildu nahi dugu Makean, kalitatezko dantza emanaldi baten aitzakiaren gibelean, euskal preso politikoen sustengatzeko parada ona baita.

F Kulturaren betebeharra al da aldarrikapen politikoak garraiatzea
Ez dakit bete behar bat denez, baina guk hola sentitu dugu eta hola egin dugu. Artea barneko sentimenak plazaratzen dituen bitartekaria da. Eta oinarrizko eskubideen errespetua eta elkartasuna baloretzat jotzen ditugularik, horrelako konpromisoak hartzea ez da harritzekoa! Dantzariok gure ekarpen xumea ekarri nahi izan dugu gaur, baina ez gira hortan mugatzen.

G Nola iraganen da gaualdia Zer da egitaraua
Zazpietatik goiti zintzur bustitze bat izango da ikusleak berotzeko eta ikusgarri hontan izango den sua hobeki jasotzeko. Bederatzietan denak prest ikusgarriarentzat! Hamaikak eta erditan erromeria izango dugu txarangak eta kontzertua lagun.

H Zer nolako publikoa espero duzue
Publiko andana bat eta ainitza! Baina gure erronka nagusia kulturzalea den publikoa baina presoen alde sobera mobilizatzen ez dena ekartzea da. Eta alderantziz, kultura sobera ezagutzen ez duen militante eta bestazale gaztea, dantza emanaldi berritzaile eta eder baten ikusterat ekarri behar dugu. Interesgarria baita munduak nahastea eta bakotxaren praktikak itzulipurdikatzea...

Dokumentuaren akzioak