«Oso talde interesgarriak datoz eta benetan ikusgarria izango da jaialdia»

Oier Araolazak, Kezka Dantza Taldeko arduraduna, atseginez espero ditu asteburu honetako jaialdiak. XLII Euskal Jaiak makila-dantzak izango ditu protagonista

Lortutako programak Nafarroa, Errioxa, Katalunia, Iparralde, Aragoi, Castellon eta Euskal taldeak osatzen dute. Denak amankomunean dutena makila-dantza jorratzen dutela da. «Pleno bat lortu dugu, oso talde interesanteekin eta benetan ikusgarria izango da jaialdia» aipatzen du Araolazak.

Joan den urtean, ezpata-dantzen emanaldiak antolatzea bururatu zitzaien Kezka Taldekoei, eta monografikoetan aurkitu dute formula positiboa. «Iaz, esperimentu bat zen. Euskal Herrian aspaldi egin zen ezpatadantza jaialdi bat, txikia, baina gaur egun ez da egiten horrelakorik, ezta kanpoan ere. Ingalaterran, ezpatadantza jaialdi bat egiten zela genekien, baina azkeneko lau edo bost urtetan ez da egin».

Dantza zehatzak harturik, publikoaren faborea lortu zuten joan den urtean. Hori bera azpimarratu du Araolazak. «Bide hori probatu genuen iaz eta arrakastatsua suertatu zen. Zalantzak ere bazeuden, oso monotonoa izango zen ala ez zen izango... eta justu kontrakoa ikusi dugu, benetan interesgarria gertatzen dela jenero berdinan lan egiten duten taldeak elkartzea eta jendearentzat ere interesantea da. Ikasteko aukera ematen du, gauza diferenteak apreziatzeko».

Ingalaterratik

Datorren igandeko jaialdiak protagonista berezi bat izango du. The Britannia Coco-nut Dancers of Bacup taldeak desberdinen artean desberdinena izango da. «Talde batek eskemak apurtuko baditu aurten, hori izango da Ingalaterrakoa» aipatu zuen Arazolazak. «Jendeak sorpresa hartuko du horrelako ikuskizunarekin. Makila-dantzak dira gai nagusia eta, ikusiko dugunez, hauek ez dute makilik erabiltzen. 'Koko' azal moduko batzuk erabiltzen dute elkar jotzeko. Erakusten da elementua makila dela, baina hori baino gehiago da jeneroa bera egiten duena. Ezaugarri gehiago daude, taldearen formazioa, janzkera, dantza egiteko modua... eta batzutan, kasu honetan bezala, konsideratu daiteke makilarik gabe ere, dantza mota horretakoa dela». Horretarako Kezkako dantzariak beste alde batzuk aipatzen ditu. «Dantzatzeko era aldetik, teatralidade eta musika aldetik, oso oso desberdinak dira. Askoz dantza egiteko modu lasaiagoa, armonikua eta berezia erabiltzen dute. Ikusteko modukoa izango da».

Osagai guzti hauekin, Untzagan aurkeztuko den jaialdia ikustekoa izango da. «Eguraldi goraberatsua dabil baina espero dut ekitaldietarako eutsiko duela» dio Araolazak. «Eta txarren txarrenera abantaila bat daukagu, Coliseo Antzerkia hor daukagula prest. Hori lasaitasuna da guretzat. Pena izango litzateke beste noizbait gertatu den bezala, suspenditu behar izatea. Ez dugu izango horrelako arazorik».

Oier Araolaza asteburuan ikusgai izango diren makilekin. [MORQUECHO]

Bihar 19.30: Grupo de danzas Yona de Cortes (Nafarroa), Danzantes de San Asensio (Errioxa), Haritz Dantzari Taldea (Elgoibar), Otsabiagako dantzariak (Nafarroa) eta Kezka Dantza Taldea (Eibar).

Igandea 12.30: Yona de Cortes (Nafarroa), Bastoners de Terrassa (Katalunia), Oin Arin dantza taldea (Antzuola), Pauliteiros de Miranda do Douro (Portugal), Errobiko Kaskarotak (Ustaritze), The Britannia Coco-nut Dancers of Bacup (Ingalaterra), Indarra Dantza Taldea (Gazteiz), El Todó-Danses Guerreres de la Todolella (Castellon) eta Kezka Dantza Taldea (Eibar).

Oharra: Ikuskizunak Untzaga plazan izango dira. Eguraldi txarra egingo balu, Coliseo Antzokian egingo dira emanaldiak.