Hemen zaude: Hasiera Hemeroteka Oskorrik antzinako dantzak egungo moldeetara ekarri eta plazara eramango ditu

Dokumentuaren akzioak

Oskorrik antzinako dantzak egungo moldeetara ekarri eta plazara eramango ditu

Proiektu horretako zenbait pieza igandean estreinatuko ditu, Gasteizen egingo duen kontzertuan

Egilea
Ainhoa Sarasola
Komunikabidea
Berria
Mota
Albistea
Data
2010/05/20

Frantziako Iraultzaren garaian galdu edo modaz pasatu ziren Gipuzkoako doinu eta dantzak ditu oinarri Oskorriren proposamen berriak, Natxo de Felipe taldekideak azaldu duenez. «Haien berri asko ditugu orduko dantza maisu baten bidez, Juan Ignazio Iztuetaren bitartez». Galtzear ziren dantza pauso haiei buruz liburua kaleratu zuen Iztuetak 1824an. Bi urtera, Donostiako Santa Maria elizako organo jotzaile Pedro Albenizen laguntzarekin, doinu haiek partituretara ekarri, eta beste liburu bat kaleratu zuen. «Ia gure hastapenetatik, duela 40 urtetik ezagutzen ditugu partitura haiek, eta aspalditik genuen haiekin zerbait egiteko gogoa». De Feliperen hitzetan, «oso material bitxia da, musika aldetik oso gauza diferentea; oso musika primitiboa da».

Dantza asko dira, baina haietariko batzuk Baztangoen edo Ipar Euskal Herriko jauzi dantzen modukoak direla uste du De Felipek. Hala, proiektua martxan jartzeko, dantzaren arloan eskarmentu handia duten bi lagunengana jo zuen taldeak: Mari Kruz Goñi eta Amadeo Arretxearengana. Haien esku utzi zituzten dantzak moldatzeko lanak. Halaber, kontzertuetan Baztango dantzarien talde txiki bat taula gainean arituko dela aurreratu du De Felipek. Haietariko batek dantza pausoak azalduko dizkie dantzan egin nahi duten entzuleei. «Haien modura berriz asmatu edo moldatu dituzte Baztango lagunek guk proposatutako doinuak, eta dantza eta doinu horiek ekarriko ditugu plazara».

Doinu zaharrak izanagatik ere, ez dute «folklorearen berreskuratze bat» egin nahi izan, proposamen berri bat baizik. «Doinu haiek hartu, eta gure modura moldatu ditugu, eta gure modua, jakina, ez da XVI. mendekoa. Gaur egun sortutako dantza berriak dira, nahiz eta antzinako pausoetan oinarritu». Taldearen kezka ez da izan XVI. mendeko Gipuzkoan dantza haiek nolakoak ziren erakustea. «Proiektua ez da sortu antzinako dantzak sortzen ziren lekutik, ez da nekazaritza giroan, baserrian sortu, hirian baizik; hiritarra da, urbanita».

Apurka-apurka dantza gehiago estreinatzen joango da taldea -esaterako, ekainaren 19an Zugarramurdin eta Bilboko Aste Nagusian-, eta aurrerantzean erromeriak ere egingo ditu, ohiko kontzertuez gain. Material guztia biltzen dutenean eta dena ondo bidean, heldu den urteko udaberri aldera, proiektu berriarekin disko, DVD eta liburu bat ateratzeko asmoa ere badu Oskorrik.

Dantza kluba, sarearen bidez

Proiektu beraren barruan, «dantza klub» moduko bat sortu nahi du Oskorrik. Internet bidez, dantzazaleen arteko sare bat osatzea da asmoa. Parte hartu nahi duen orok natxooskorri@euskalnet.net helbidera mezu bat bidali baino ez du egin beharko, eta klubeko kide izango da zuzenean. Halaber, kide guztiei mezua bidaliko die Oskorrik dantza pieza berri bat prestatzen duen aldiro edo kontzertuen berri emateko, besteak beste.

Ekimena duela hamar bat egun martxan jarri zutela eta «nahiko ikaraturik» daudela dio De Felipek, dagoeneko 300 kontaktutik gora dauzkatelako. «Guretzat, ustekabe handia izan da ikustea uste genuena baino zaletasun handiagoa dagoela». Halaber, igandean egingo dituzten lau dantza pieza YouTube bideoen sareko atarian jarri dituzte, ikusi eta ikasi nahi dituenarentzat. Izan ere, pauso bakoitzaren izena eta nola ematen den ikasteko aukera ematen dute bideoetan.

Dokumentuaren akzioak