Oinkari, dantzari txikien eskola handia

Eszenatokia prest, dantzariak oholtza gainean dantzan hasteko irrikitan eta musikariak ondoan, euren tresnen doinuak astindu nahian. Horrelakoak dira Villabonako Oinkari dantza taldeko emanaldiak, biziak eta ilusioz beterikoak. Horretarako, erakustaldi bikain bat eskaintzeko, lan asko egin behar izan dute aldez aurretik eta izerdi franko atera, euren maila erakusteko.

Lan guzti hori astean zehar egiten dituzten entseguetako fruitua da. Gaur egun, Villabonako dantza taldean 3 urtetik hasita eta 32 urte bitarte 241 bat lagun elkartzen dira. Lagun guzti horiek bederatzi taldetan banatuta daude eta euren buru, dantza egiten erakusteko prest Edu Munduamendiaraz eta Lurdes Esnaola daude. Azken hauekin batera, taldeko beste dantzari nagusiek Villabonan edo Asteasun hasi berriak diren txikienei erakusten diete. Izan ere, Oinkari dantza taldean 14 urtetik gora 100 dantzari daude, gainontzeko guztiak txikiak dira, 140 bat dira denetara. Hauek, nagusien artean bezala, Villabona, Asteasu, Larraul eta Adunako dantzariak aurkitzen dira.

Lan gogorra

Oinkari dantza taldea famili bat bihurtu da. Famili horretan helburu asko daude, horien artean, kideak handitzea, hauei erakustea eta etorkizun on bat izatea. Horretarako, ordu asko ematen dituzte euren kideak dantzak prestatzen, ikasten eta erakusten. Erakustaldiak jende aurrean eskaini aurretik emanaldiaren kalitatea bermatuta egon behar duelako. Hori diote behintzat, Oinkari dan-tza taldeko arduradunak diren Eneko Arteagak eta Alazne Gurrutxagak.

Kalitate hori lortzeko lan gogorri heltzen diote eta honi lagun-tzeko zuzeneko musika eransten diote. Dena, helburu bakar eta argi batekin puntu puntako talde bat izatea. Horretarako urtean 60.000 euroko aurrekontua dute Villabonako dantza taldekoek. Diru horren zati bat Udalak ematen diete. Dena den, Oinkari dantza taldekoen esanetan «zerbait gehiago egin zezaken Villabonako Udalak ikusita herrian sortzen dugun giroa eta ekintzak denontzat onuragarriak direla. Gainera, Oinkarik ezagutzera ematen du gure herria». Bestalde, azken hilabetetan lokal baten bila dabiltza dantza taldekoek, orain arte erabiltzen zuena itxi egin baitiete. Badirudi Udalarekin gai hau bideratzeko zuten harreman okertu egin dela. Gauzak horrela, Oinkarikoek aurrera jarraitzen dute eta behar duten diru gehiena taldeko kideek bultzaturiko tonbola, errifa, egutegiak, Gabonetan jarritako tabernatik ateratzen dute. Bestalde, urtean zehar emanaldiak eskaintzen ditutze. Udan batez ere. Herriz herri ibiltzen dira, eta euren saioetan 50 dantzari eta zazpi musikari profesional aritzen dira dantza tradizionalak eta bestelakoak ere eskaintzen.

Laguntza beharrezkoa

Dantza ikasten ordu asko emateaz gain, Oinkari kideek taldeko gastuei aurre egiteko lan asko egin behar izaten dute. Arduradunen esanetan «Eusko Jaurlaritzaren aldetik hutsune handia dago euskal dantza taldeei laguntzeko. Euskal Herrian dauden lau-bost taldetan zentratuta daude, bai emanaldiak antolatzerakoan baita, laguntza horiek ematerakoan ere. Gainontzekoek lan asko eginda ere, ahaztuta gauden sentsatzioa dugu. Gure ustez jarraipen arazo batean gaude eta Euskal Herriko euskal dantzak bultzatzen dituzten bezala, gure tradizioa islatzen duten dantzak ahaztuta daude. Horrez gain, herrietan emanaldiak eskaintzea oso zaila».

Emanaldi horiek iristen diren bitartean, Oinkari dantza taldekoek Murtziara aurtengo udan egingo duten bidaia prestatzen ari dira. Jumillako folklore jaialdian parte hartuko dute abuztuaren 15etik 18ra eta bertara, autobusez joango dira. Jaialdi honetan 10 taldek hartuko dute parte eta Villabonako dantzariek bi emanaldi eskainiko dituzte, ordu erdi batekoak bakoitzak. Gero, herrian barna egingo den kalejiran dan-tzan arituko dira. Antolatzaileek espero dute aurtengoan ere, 2.000 lagun hurbiltzea jaialdi hau ikustera. Oinkari Dantza Eskolako zaharrenek beriz, ekainean Holandako Bolsward Jaialdian parte hartzeko gonbitea jaso dute.

Arteaga eta Gurrutxagak ilusioz hartu dute Murtziako emanaldi hau antolatzeko erronka, baina oraindik sartuta duten arantza atera nahi dute: Euskal Herrian saio gehiago eskaini. Horretarako ezin bestekoa da Udal ordezkarien inplikatzioa, Oinkari taldekoen arduradunen ustez «euren esku baitago gu bezalako taldeak kontratatzea».

Momentuz, Oinkarikoek lanean segitzen dute, 2010ean lan berri bat estreinatzeko asmoa baitute. Horrek suposatzen du dantza berriak prestatu, jantziak berritu eta beste gauza asko egitea. Bitartean, nahi duenak informazioa lortu dezake taldeari buruz euren web orrialdean, www.oinkari.net. Bertan, agertzen da talde gazte honen lan bikaina.