Nazioartera begira jarri da dFERIA, Donostiako arte eszenikoen azoka

Taularatuko diren lanen erdiak estreinaldiak izango dira; besteak beste, Ttanttakaren 'Tatami'

Proposamen berriak erakartzea izan da antolatzaileen helburuetako bat. Feriaren barnean taularatuko diren lanen erdiak, hain zuzen ere, estreinaldiak izango dira, inoiz baino gehiago. Tartean, Brasilgo Sutil Companhia de Teatroren Avenida Dropsie lana eta Ttanttaka konpainiaren Tatami ikuskizuna izango dira.

Aretoen babesera jo dute emanaldietarako, eta aurreko urteetan ez bezala, ez dute kaleko ikuskizunik antolatu. Inguruko herrietan kale antzerkiko jaialdi ugari antolatzen direla aipatu du Azpitartek erabakiaren arrazoi gisa. Emanaldiak aretoetan eskaintzea, feriaren jatorriko izaerara itzultzea dela azaldu du Norka Chiapusok, dFERIAko zuzendariak.

Krisi ekonomikoa dela eta, Aurrekontu murritzagoa du aurten dFERIAk. Baina, Chiapusok esan bezala, «feria guztientzat izan dadin», sarreren prezioak merkatu dituzte.

Antzerki eta dantza adarretan soilik oinarrituko da aurten ekitaldia. Azken urteetan zirku emanaldiei ere egin zaie lekua dFERIAren barnean.

Hogei dantza eta antzerki konpainia inguruk hartuko dute parte jaialdian. Viktoria Eugeniako, Antzoki Zaharreko, Gazteszenako eta Lugaritzeko agertokietan emango dituzte lanak.

Euskal konpainiak

Ez Dok Hiru Biko Teatroak dFERIAn euskaraz egingo den antzezlan bakarra aurkeztuko du: Euskarazetamol. Patxo Telleriaren eta Mikel Martinezen umorezko obra Dibertimenduak izeneko triologiaren azken emaitza da.

Madril eta Tokio arteko bidaia baten kontakizuna da Ttanttaka konpainiaren Tatami lana. Hegaldian topo egingo duten bi pertsonen arteko harremana da Donostiako taldeak aurkeztuko duen antzezlanaren argumentuaren oinarria.

Aukeran dantza taldeak Gernika estreinatuko du. Euskal dantza tradizionala eta garaikidea uztartuz, bonbardaketa hildakoen ahotan jarriko dute.

Dantzaz konpainiaren 1.01, azken sorkuntza lana, eta Mama Crea taldearen ¿Se puede? antzezlana nabarmendu dituzte, dFERIAren barnean euskal konpainiek aurkeztuko dituzten lanen artean.

Hego Amerika

Aurtengo arte eszenikoen jaialdiaren apustu sendoenetakoa da Sutil Companhia de Teatroren Avenida Dropsie. Will Eisner artista grafikoaren lanean oinarrituta dago antzezlan hori. Hirietako egunerokotasunean oinarritzen da. Formatu handiko emanaldian 200 pertsona baino gehiago lantzen dituzte, emozioen mosaiko bat eraikiz.

Hego Amerikak presentzia handia izango du dFERIAren XV. aldi honetan. Familiako harremanen analisia egiten du Uruguaiko Complot konpainiaren Mi muñequita lan gordinak. Bere barne ahotsari oihartzuna emango dio Mireia Carbonek Paso doble lanean. Norbera den bezala agertzearen premia eta etengabeko barne borroka da Perutik datorren lan horren oinarria. Costa Rica eta Salvadorretik Mirando al sur ekarriko dute, migrazioari buruzko lana, eta Argentinatik Desdichado deleite del destino, identitate nazionalean blaitutako testua. Pertsonaia arazotsuak eta matxistak arituko dira agertokian. Hondurasko Grupo Teatral Bambu-k alkoholismoari buruzko gogoeta egiten du Mea culpa lanean.

Europa

2016an Europako kultur hiriburua izateko Donostiaren hautagaitza indartzeko Europara begira ere antolatu dute aurtengo dFERIA. Hain zuzen ere, Polonian helburu bera duten bi hiritatik, Sopot eta Lublinetik, dantza eta antzerki konpainiak ekarriko dituzte.

Provisorium konpainiaren Bite the Dust lana Poloniako Armada Nazionalaren pentsamolde militarrari buruzko satira dela azaldu du Norka Chiapusok, dFERIAko zuzendariak. Bigarren Mundu Gerrako izugarrikeria kontatzen du istorioak.

Teatr Okazjonaly dantza eta antzerki konpainiak bi lan ekarriko ditu: D-KOD-R eta Powiekzenie. Lehena, dantzaren hizkuntzaren eta giza gorputzaren komunikatzeko ahalmenak sortutako liluran oinarritzen da. Nork bere burua norbanako gisa ezagutzeko bizi duen prozesua du bigarren obrak hizpide. Azken horretan dantzari bakar bat arituko da agertokian.

Espainiako eta Herrialde Katalanetako ordezkaritza ere izango da arte eszenikoen ferian.

Programa eta konpainiei buruzko informazioa biltzen du www.antzerki.com webguneak.