Museoa dantzari

Hiru solairuko erakusketa eskaini dio Uharteko Arte Garaikideko Zentroak dantzari eta mugimenduaren arteari

«Antzinako formak ez ziren balekoak jada, giza gorputzaren aukerak esploratu eta suspertu egin behar ziren, dantza haien barruan bildu ahal izateko». Doris Humphreyren (1895-1958) hitzak dira horiek. Bera izan zen Isadora Duncan eta Ruth Saint Denis dantzariek irekitako bideari jarraitu eta XX. mendeko lehen hamarkadetan dantza garaikideko izenik ezagunenetariko bat. Hark esandakoekin hasten da Uharteko Arte Garaikideko Zentroan (Nafarroa) atzo ireki zuten dantza eta mugimenduaren arteari buruzko erakusketa. Humphreyren aipua oinarri, hamaika artistaren lanak ikus daitezke. Egungoak guztiak. Esperimentalak. Balleteko oinetakorik ez, kasik, Sol Pico talde kataluniarrak Uharterako egindako instalazioan paella ontzien barruan daudenak salbu. Hori da erakusketaren asmoa: oinetakook alboan utzita, egun egiten den beste dantza mota bat erakustea. Ia museo guztia eskaini diote dantzari. Hiru solairu.

Bi erakusketa dira, berez, zentroan abuztura arte izango direnak, baina bakarra balira bezala bisita daitezke. Paisaia koreografiko garaikideak izenekoa da lehen solairuan dagoena, eta Frantziako Zinematografia Zentroak prestatutako hainbat dokumental ditu ardatz. Aretoan zehar han-hemenka banatutako pantailetan ikus daitezke bideoak.

Bost ataletan dago banatuta aretoa: gorputza da lehenengoan artistek aztertzen dutena; sortze prozesuan sakontzen du bigarrenean Michel Follin dantzariak; Anna Halprin dantza post-modernoko dantzari ezagunenetariko batekin solasean ageri da Alain Buffard dantzaria hirugarren gunean, Elkarrizketak izenekoa; kalean, fabrika batean eta bulego baterako sorturiko dantza lanen bidez, pertsonaren, mugimenduaren eta espazioaren arteko harremanak aztertzen dituzte laugarren guneko dokumentalek; eta dantzaren lexikoa, berriz, bosgarren atalekoek.

Dantzari buruzko zinema

Zinema areto bat ere badago lehen solairuan. Samuro Teshigawara koreografoak Lilleko eskolako (Frantzia) ume itsuekin egindako lanari buruz prestaturiko dokumentala dago orain ikusgai. Abuztura bitartean, ordea, aldatu egingo dute astero museoan emango duten filma. Hamalau koreografo, dantzari eta sortzaileren lanak izango dira guztira ikusgai, eta www.centrohuarte.es webgunean dago zerrenda osoa.

Egin eta des(egin) izeneko erakusketa dago bigarren solairuan, eta Herrialde Katalanetako dantzatik gertuko LiquidDocs izeneko laboratorio esperimentalak prestatu du. Katalunian sortzen duten hainbat artistaren lanen laginak aurkezten dizkio ikusleari erakusketak, hainbat dokumentalen bidez. Sortzaileok Uharterako espresuki prestatutako instalazioak ikusi eta eraldatzeko aukera ere ematen dio. Sonia Gomezek entzungailuekin jantzitako eskeletoak mugi ditzake bisitariak, Societat Doctor Alonsoko kideek jarritako berezko tamaineko bost gorilekin dantza daiteke eta Angels Margarit koreografoak prestaturiko labirintoa eralda dezake, besteak beste.

Dokumentazio gunea dago hirugarren solairuan, eta performance-ari, dantza garaikideari eta mugimenduaren arteari buruzko hainbat liburu kontsulta daitezke bertan. Hor dago LiquidMaps izeneko ekimenari eskainitako gunea ere. Mugimenduaren artearen alorreko sorkuntzari eskainitako Interneteko plataforma bat da LiquidMaps. Googlemapsen mapen gainean arte mota horren inguruko hainbat eskaintza egiten dituzten guneak ageri ditu, eta haietan klik eginez, informazioa bil dezake erabiltzaileak. Profesional eta zaleek mundu osoko eragile, gune eta erakundeen berri jasotzea da tresnaren asmoa. Oraindik, baina, probarako eredua baino ez da Uharteko zentroan ikus daitekeena, eta bi hilabete barru izango da martxan behin betiko eredua.

Erakusketez gain, apirilaren 10ean Angels Margariten ikuskizuna eta master class bat eskainiko ditu Uharteko zentroak, eta ikuskizun propio bat ere prestatuko dute, gainera, apirilaren 29rako. Eskola adineko ume eta gazteentzako tailerrak ere izango dira.