Edukira salto egin | Salto egin nabigazioara

Tresna pertsonalak
Hemen zaude: Hasiera Hemeroteka Miarritze hamar urte dantzan

Dokumentuaren akzioak

Miarritze hamar urte dantzan

Biarritz Ballet zentro koreografikoak hamar urte beteko ditu aurten, hasieratik Thierry Malandain koreografoa buru duela.Urtemuga dela eta, 'Carmen' eta 'Don Juan' emanen ditu asteburuan Miarritzen

Egilea
Nora Arbelbide
Komunikabidea
Berria
Tokia
Miarritze
Mota
Albistea
Data
2008/12/19

Beti labainkorra baldin bada ere kultura eta diruaz aldi berean mintzatzea, atzera begiraden orduan balio du, agian. Thierry Malandain zentroaren hasieratik balletaren buru eta koreografoa pozik dago balorazioa egiterakoan, bereziki hamar urtez Miarritzek eta inguruko publikoak bereganatua duelako konpainia. Heldu den urteetako erronka bide hori jarraitzeaz gain garapena atzerrian segitzea dutela dio. Libano, Zipre, Mexiko eta Mazedoniara joatekoak dira, besteak beste.

Beste zifra batzuk ematekotan, aipa daitezke hamar urte hauetan egin 762 agerraldiak (aurtengo agorrileko zifra da). Miarritzen bertan, 101. Horiei guztiei esker, 500.000 ikusle bildu dituzte. Hasieran, 12 dantzari ziren intermitente estatutua zutenak, eta gaur egun 17 dantzari dira hilabete sari finkoarekin. Teknikoak eta administraziokoak barne 30 bat dira.

Orotara 33 sorkuntza

Sorkuntza aldetik, 33 sorkuntza gauzatu ditu balletak. Jakinez zentro koreografikoen betebeharretako bat, publikoaren sentsibilizatze lanez gain,sorkuntza bultzatzea dagoela. Eta, funtsean, Thierry Malandain Biarritz Balletako koreografoak ere hori du gustuko. Tamalez, azkenaldi honetan, begi bistakoak ez diren obretarako aukera gutxi dago, Malandainek berak azaldu duenez: «Krisiagatik, ahal bezainbat sartze egiteko, publiko zabalak ezagutzen dituen izenak bakarrik nahi dituzte antzokiek. Berrikitan Mari Errauskin egitea eskatu didate. Ez dut gogorik, eta, beraz, beste idei baten bila nabil».

Begi bistakoak eta narratiboak. Malandainek, ordea, abstrakziora joan nahiko luke orain. Duela hamar urte, alta, istorioak kontatzea gustukoa zuen, nahiz eta kritikek modaz kanpo zela leporatu. Asteburu honetan emanen duen Carmen sorkuntza garaikoa du, justuki. Duela hamar urte asmatua, horrekin etorri zen Saint Etiennetik Miarritzera bere balleta. Agerraldi horretatik landa zion eskatu Miarritze hiriko udalak Miarritzen gelditzea. Orduko hori emanen dute igandean 17:00etan, eta astelehenean 20:30ean, jantzi eta apainketa berriekin. Lagun izanen du Don Juan, 2006ko sorkuntza. Bi balletak koreografoak izan duen bilakaeraren lekuko. Carmen, beraz, balleta narratiboa, eta Don Juan abstraktuagoa. Hori bai, biak dantza neoklasikoan, hori baita Malandainen estiloa. Biak sedukzioa dutela gaitzat, bata emazteen ikuspegitik eta bestea gizonekotik, biak dira ezagunak eta, beraz, arrakasta segurtatua dute hauek ere. Igandeko sala betea dute, eta astelehenerako, laster.

Dokumentuaren akzioak