Maitaldia hegaldatuko da bihar

Dantza airatuko da Miarritzen, bihartik goiti. Maitaldia dantza jaialdiaren hemeretzigarren edizioa 19:00etan hasiko da, Udal Kasinoan. Luc Petton koreografoaren Frantziako Le Guetteur taldearen ikuskizunean, dantza airean izanen da, hain zuzen, dantzariek bezainbat protagonismo ukanen baitute txoriek. Txorien konfidentzia ikuskizunean, dantzariak egiazko txoriekin ariko dira dantzan. Ikusgarri berezi eta «liluragarria» ekarrarazi du Biarritz Culture elkarteak, jaialdia hasteko.

Ondotik, Alemaniako Wiesbadengo baletaren ikusgarria izanen da, Midi geltokian, 21:00etan. Philip Glass, Stravinski eta Ravelen musiketan oinarrituz, hiru koreografia dantzatuko dituzte, Munduaren begia ikusgarrian bilduz. Lehenak, ametsen munduan murgilduko ditu ikusleak; ametsetatik iratzartzeko une zehatza taularatuko dute. Ametsek pertsona bakoitzaren mundu zabal, ezezagun eta sekretua islatzen dutela erakutsiko du. Bigarrenak ni-ari begiratuko dio. Ni asko direla eta ezin dela erran ni bakarra dela azpimarratuko dute. Bakoitzaren ametsek erakusten dituztenen haritik, «ni asko» horiek dantzatuko dituzte.

Hirugarren koreografia Bolero dantzaren irakurketa ohiz kanpokoa eta burleskoa izanen da. Dantza horrek bertsio anitz ukan badu ere, «gehienek erotismo zerbait erakusten dute, gazteria eta edertasuna bilduz», Biarritz Culture elkartearen arabera. Wiesbadengo balletekoek adineko sei emazte ezarriko dituzte dantzan, eta haien plazer iturria kafea eta ahamen goxoak dira.

Dantza karrikan

Larunbatetik aitzina, egun osoan zehar izanen dira animazioak. Udal Kasinoko eta Midi geltokiko dantza ikusgarrietako sarrerak ordaintzeko dirurik aski ez duenak ere ukanen du dantzaz gozatzeko parada. Goizetan dantzariak ikusi ahal izanen dira karrikan. Larunbatean, 10etan, Ex Nihilo taldekoek Clemenceau plaza hartuko dute. Aulkietan jarririk egonen diren arren, dantzan ariko dira. Oinezkoei une batez gelditzeko gonbidapena luzatuko diete. Eguerdian, lorategi publikoan, Marie-Laure Agrapart konpainiaren emanaldia izanen da. Mediatekan hitzaldiak antolatuko dituzte, horrez gain. Hurrengo egunetan ere non nahi ikusi ahal izanen dira dantzariak, kanpoan, irailaren 20a arte.

Larunbat ilunabarrean, Grimaldi taldeak pizkunde garaia taularatuko du Koliseo gelan, 19:00etan. Bi ordu geroago, Dansk Danse Teater taldea izanen da Udal Kasinoan. Igandean, Herbehereetako Gotra Ballet taldeak margolanak, musika, bideoa, antzerkia eta dantza nahasiko ditu Udal Kasinoan, 19:00etan. 21:00etan, Midi geltokian, Europako dantza talde zaharrena eta ospetsuenetarikoa izanen da: Suediako operako errege baleta. Brahms et Mendelssohnen bi lan emanen dituzte. Dantza klasikoa izanen da, kutsu garaikidearekin.

Hamar egunez, orotara 40 ikusgarri baino gehiago izanen dira Miarritzen, Thierry Malandain zuzendari artistikoak prestatutako egitarauan. Dokumentalak, argazki erakusketa eta zinema emanaldia ere prestatu dituzte.