Lekuz Leku jaialdian dantzak eta arkitekturak bat egingo dute talde askoren lanetan

Kanpoko eta hemengo 15 talde dantzatuko dira Bilboko Abandoibarra pasealekuan gaurtik larunbatera bitartean

Korea, Argentina, Suitza, Euskal Herria eta beste herri batzuetako taldeek 18 obra eskainiko dituzte. Bilboko eremu horrek berezko dauzkan ezaugarriak aztertu ondoren plazaratuko dituzte lanak zenbaitek. Itsasadarraren ertzetan, elementu arkitektonikoen mugan. Paisaia piezaren parte bihurtuz, betiere.

Dantzarekin batera, bideoa da Lekuz Leku festibalaren beste ardatza. Dantzatzen diren hirien jaialdien zirkuituaren barruan dago Lekuz Leku, halaber. Europako eta Ameriketako 38 jaialdik osatzen dute, eta horietako hamarretan izandako taldeek emandako lanen bideoak erakutsiko dituzte hiru egunez, Abandoibarrako kioskoko kafetegiaren ondoan paratuko duten karpan.

Besteak beste, Argentinako Rosario eta Buenos Airesko jaialdietako lanak, Bartzelonako Dies de Dansan emandakoak, Belgikako Eupengo Danse en Ville erakutsitakoak eta Brasilgo Sao Pauloko Visoes Urbanasekoak ikusi ahal izango dira, bideo emanaldietan. 19:00etan hasiko dira.

Ikusleak dantzari

Dantza emanaldi gehienak kalean izango dira, Guggenheimen inguruetan. Baina bakar batzuk EHUko ekitaldi aretoan izango dira. Gaur kalean izango direnen artean Leire Ituarte, Matxalen Bilbao eta Pilar Andresen Mazing dago. «Lan eklektikoa» dela diote hiru koreografoek, orain artean estilo desberdinak jorratu baitituzte hirurek. 19:00etan aurkeztuko dute. Apunta zaitez! lelopean, ikusleen parte hartzea sustatuko duen lana osatzen saiatuko dira hainbat koreografo, 21:00 aldean. Matxalen Bilbaok gidatuko du ikuskizuna, Borja Ramosen musikarekin.

Koreako Spring Dance Theater konpainiak Arirang arariyo lana emango du bihar Guggenheim inguruan, 19:00etan. Choi Kyung-shilek diseinatu du Koreako abesti tradizional baten inguruan. Minari eta erresistentziari buruzkoa da. Koreako beste koreografo batek, Jang Eun-Jungek Q&A lana emango du jarraian, gizon eta emakume baten arteko tentsio harremanean oinarrituz. Herrialde hartako beste bi talde ere izango dira, bata bestearen ostean. Edx2 Dance Company eta Park Soon-ho Dance Project. Modern felling eta Pattern & variability emango dituzte, hurrenez hurren. Kukaik azken kreazioa erakutsiko du, Karrikan. Guggenheim aldamenean emango du, 21:00etan.

Iruñeko Via 4 taldeak emango duen izen bereko piezarekin hasiko dira larunbateko emanaldiak, 19:00etan. Carmen Larrazek zuzendutako lanaren ostean, Suitzako 7273 konpainiak Climax eta On Stage piezak eskainiko ditu EHUko ekitaldi aretoan. Eneko Alcarazek, Igor Calongek eta Daniel Abreuk Fundicionen Istripuak egitasmoaren barruan sortutako Awkaward lana aurkeztuko dute Guggenheim inguruan, 20:30ean.

Orobat, dantza garaikideko profesionalen topaketak eta dantza eta arkitektura lotzen dituzten ikastaroak izango dira Lekuz Leku jaialdian egunotan.