Larunbatean Irrintzi taldearen ikuskizuna

Ikusleek parte hartzea bilatuko du dantza jaialdian Irrintzi taldeak.

Irrintzi taldeak Dantza Jaialdia antolatu du larunbaterako. Ekitaldia 19:30ean hasiko da Zumarragako Zelai Arizti aretoan. Lekua mugatua denez, eta sarrera doan bada ere, txartela hartu beharko da leihatilan, 18:30etik aurrera. Pertsonako lau txartel har daitezke gehienez.

Ekitaldian publikoaren parte-hartzea bilatuko dute, horixe izango da aurtengo berritasuna, taldekoen arabera. Sorpresa izatearren ez dute argitu parte-hartze hori nola bultzatuko duten. «Familia giroa egon ohi da ikuskizunean, eta testuinguru horretan bilatuko dugu ikuslearen kidetasuna».

Dantza mistoak

Horrez gain, «inoiz baino dantza misto gehiago» aurkeztuko ditu Irrintzik, bai haurrekin, bai helduekin. Helduan saioan, esate baterako, Zuberoako Fandangoa hala izango da. Hango talde batek erakutsi zigun eta nobedadea da guretzat». Nolabait ere Zuberoak protagonismo berezia izango du jaialdian, «makil dantzak ere hango ukitua hartuko du».

Jaialdian ehun haurrek eta 25 helduk hartuko dute parte. Aretoa betetzea ziurtzat dute, eta ia urtero izaten da sarrerarik gabe kalean gelditzen den bat edo beste.

Dantzariez gain musikariak ere izango dira oholtzan. Endika Alzelai txistuaz eta txirulaz arduratuko da, Zuhaitzaren Soinua kolektiboko kideak txalapartaz, eta Aitor Areizaga soinuaz.

Iazko jarduna berezia izan zen, Irrintzik 40. urteurrena betetzen zuelako. Baina aurten ere badituzte erronkak. Hala nola larrain-dantza ikastaroa antolatzeko asmoa dute. «Urtero Santa Isabel jaietan dantzatzen denean betikoek dantzatzen dugu, baina jendea erakartzen du. Beti pentsatu izan dugu aproposa litzatekeela ikastaroa antolatzea, eta aurten egingo dugu, maiatz aldean edo».

«Helduak, ongi etorriak»

Dantza taldearen egoera «oso ona» da. Batez ere haurren parte-hartzea oso nabaria da. «Helduak, ordea, gutxiago daude, eta oso gustura hartuko genituzke animatzen direnak, dantzariak zein musikariak», diote.

Datozen asteetan inguruko herrietan izango diren Dantzari Txiki egunetan parte hartuko dute, hala nola Legazpikoan hilaren 27an. Gero Zumarragakoa iritsiko da, maiatzaren 18an. «Azkenaldian Eitzako jaien barruan antolatu izan dugu eguna, hango ekitaldi bezala, eta aurten ere hala egingo dugu». Horrekin batera Santa Isabel jaietako ekitaldien antolakuntzari ekingo dio taldeak, uztailaren 2an izaten baita garrantzitsuena.