Sokadantzatik abiatutako kaleko dantza ikuskizun garaikidea atondu du Kukai konpainiak

Soka du izenburua Kukai dantza taldearen ikuskizun berriak. Etzi estreinatuko dute Leioako Umore Azokan. Larunbatean ere eskainiko dute jaialdi berean, eta ondoren Valladolideko (Espainia) Kale Antzerki Jaialdira joango dira, Euskal Herrian bira hasi aurretik.

Ez da Kukai kalera irtengo den lehen aldia, Logela Multimediarekin batera ekoitzitako Taupadak (2007) ikuskizuna ere kalerako atondua baitzen. Baina hark antzokietarako elementuak zituen, eta Soka «espresuki kalerako prestaturiko» ikuskizuna da, Jon Maia Kukai taldeko kideak eta koreografoak dioenez: «Dantzariak modu zirkularrean ariko dira, edozein lekutatik ikus daitezen, ez da batere frontala».

Bilaketa bat. Aldaketa bat. Urrats bat. Hiru gauza horiek daude Soka-ren atzean. Gipuzkoako sokadantzan oinarrituriko urratsak eta edukiak darabiltzate dantzariek, baina «begirada berri bat» eman nahi izan diote. Badira norgehiagokak, badira eskaintzak , pertsonen bat egiteak, festa..., dantza tradizionalari dagozkion elementuak, azken batean, baina bada esperimentazioa eta lengoaia koreografiko berri bat ere. Bilaketa horretan, Pantxika Telleria koreografoarekin topo egin zuten Kukaiko kideek. Telleria eta Maiaren artean osatu dute Soka-ren koreografia. Telleriaren ustez, «aldioroko desafioa» da dantza ikuskizuna kalean egitea: «Kalea sekula ez da berdina, beti aldatzen dira baldintzak eta ingurunea. Horietara egokitzeko kodea sortzea izan da gakoa».

Perkusio hotsez osaturiko musika Iñaki Telleria eta Jorge Pachecoren esku egongo da. Telleria bera arduratu da musika sortzeaz: «Sokadantzaren musika erritmoak aintzat hartuz eta dantzarien beraien mugimenduei erreparatuz sortu dugu musika. Esperientzia berria eta ederra da ikus-entzuleen harremana zuzenean kalean sentitzea».

Kukaik aurrez prestatu dituen lau dantza ikuskizunetan -1937, gogoaren bidezidorretik (2006), Otehitzari biraka (2006), Taupadak (2007), Hnuy illa... (2008)- dantza egin izan du Jon Maiak. Soka-n aurrenekoz geratu da dantza egin gabe, nahiz eta aurrerago egiteko aukera izango duela esan duen. Maiarentzat, dantza kalera eramatea «oso garrantzitsua» da: «Dantza antzokietan egitea ere asko gustatzen zaigu, baina jendea ohitu nahi badugu, guk jo behar dugu beraiengana».
  Hamabi euskal taldek obrak estreinatuko dituzte Leioako Umore Azokan asteburuan

Hamar urte beteko ditu Leioako Umore Azokak, eta inoiz ez bezalako egitarauarekin ospatuko du bihartik igandera bitartean. 55 obra eskainiko dituzte mundu osoko 48 konpainiak. Orotara, 150etik gora emanaldi egingo dituzte Bizkaiko herriko kaleetan. Horrenbestez, kaleko arte eszenikoen topagune bihurtuko da Leioa. Hamabi euskal taldek hamahiru obra estreinatuko dituzte, aurten. Kukairen Soka obraz gain, Kukubiltxoren El derecho al derroche eta Morttimer ere ikusi ahal izango dira Leioan. Baita honakoak ere: Ados Teatroaren Emotikon, Ganso & Ciaren Caídos del cielo, Jon Zabalen Pensamientos encontrados, Atropeciasen Echadas al mar, Debote enboteren Argotu, La Pezen El gran show de la Patera Rosa, Trapu Zaharraren ¡Vaya ganga!, Los del Terceroren Voces en el parque, Pikor Teatroren Ellas bailan solas eta Teatro Salitreren On egin mon amour.