Kolonbiako bortizkeria oinarri duen dantza gaur Miarritzen

Zehazki, kontatuko duten istorioa baserri mundutik hirira doazen herritarren bizitzan oinarritzen da. Bortizkeriari ihes egiten dioten horiena. Izenik gabeko bederatzi pertsonairen bitartez, sustrairik gabekoen beldurrak, minak eta itxaropenak dantzatuko dituzte: «Lan biziki fisikoa da. Bakoitzak arazo horiei gaina hartzeko eramaten duen borroka adierazten dugu. Kolonbian anitz sufritzen da. Gerrak ez dauka etsai zuzenik. Baina sufrimendu horretatik indarra jalgitzea lortzen dugu beti», gaineratu du koreografoak. Besteak beste, Armero herrian 1985ean sumendiaren ondorioz izan lohi-jauziak hil milaka herritarren hilzoria ere oroitaraziko dute: «Oro har gure herriaren egia barnetik erakutsi nahi dugu», laburbildu du Fernandezek. Hasteko, obra hau arraroa ere izanen da.

GARAPEN GARAI BATEAN. Ez baita usu Latinoamerikatik heldu den konpainia baten ikusteko aukerarik hemen gaindi. Ez, agian, horrelakoa. Alabaina, Kolonbiako konpainia profesionalen artean, garrantzitsuenetako bat da L'Explose, ez bada garrantzitsuena. Aurten bertan berrikitan sortu Kolonbiako dantza sari nagusia eskuratu berri du. Eta horri esker estudio bat eraikitzeko aukera ukanen dute. Keinu pozgarri bat, biziki begi onez ikusten duena koreografoak. Keinu adierazgarri bat ere, Kolonbian dantza garaikidean bere zuloa egiten ari den seinale. Alabaina, berriki arte dantza eskolarik ez bazen, azken urteetan anitz hasi dira eta orain horren lehen fruituak jasotzen ari dira. Gainera, Latinoamerikako beste hainbat herritan bezalaxe, dantza barnetik bizi dute Kolonbian: «Zinezko adierazteko manera bat da. Salsa, merengue eta beste... Gure kultura, berez, gorputzetik pasatzen da», zehaztu du ikusgarriaren dramaturgia landu duen Juliana Reyesek. Konpainia hau, haatik, ez da salsan arituko gaur arratsean. Izan ere, koreografoa espainiarra da sortzez, asturiarra hain zuzen. Eta hamabost urte Parisen iraganak ditu Kolonbiara joan aitzin: «Kolonbiarrek daukaten berotasun horri iparraldeko kulturetan norberak bere burua kontrolatzeko duen joera gehitu diot. Bien arteko harreman berezitik ateratzen da nire dantza».