Kanpai hots eta txupinarekin dator festa

Kanpai hotsak eta txupina. Bi elementu horiek ateratako zarata uztartuta abiatuko dituzte Elgoibarren (Gipuzkoa) sanbartolome jaiak, gaur arratsaldean. Pilar Ikastetxeko ordezkariek izango dute txupina jaurtitzeko ardura, eta haiei dagokie herriaren egunerokoa eraldatuko duten jaiei hasiera ematea. Txupina jaurtitzearekin batera, Mauxitxa txarangaren kalejirak girotuko ditu herriko kaleak.

Aurtengo sanbartolomeak bereziak izango dira herriko hainbat elkarterentzat. Mauxitxa txaranga sortu zela 40 urte bete dira, adibidez, eta urte horietan guztietan egindako lana eskertuko diote herritarrek. Ia egunero aterako dira kalera txarangako musikariak. Ez da, ordea, ospakizunetarako motiboa duen herriko talde bakarra. Elgoibarko Musika Eskolak mende laurdena bete du, eta mende erdia Gure Bide txirrindulari elkarteak eta Zubi-Ondo xake taldeak. Modu batean edo bestean, guztiek izango dute txokoa sanbartolometan.

Baina azken urteotan herriko zaindariarekin lotura eta harreman estua ezerk izan badu, San Bartolome eguneko soka-dantzak izan du. Bihar dute zaindariaren eguna elgoibartarrek, eta Haritz euskal dantza taldeak 75. urtez dantzatuko du soka-dantza, Foruen plazan. Horretarako, Udaleko Txistulari Bandaren laguntza izango dute.

Profesionalen pilota partidak, Erraldoi eta Buruhandien kalejira eta Zaldien Dantza ikuskizuna izango dira bihar arratsaldeko ekitaldi nagusietakoak. Gauean, berriz, su, argi eta musika ikuskizuna, eta Aukeran dantza taldearen emanaldia: Aukeran 10 urte.

Denetariko egunak

Abiatu gaur abiatuko diren arren, ia aste osoan izango dituzte festak Elgoibarren. Biharkoa da San Bartolome eguna, zaindariaren eguna, baina ondorengoetan ere asmatu dute festa eguna nori eskaini. Asteartean Txiki Eguna antolatu dute, eta asteazkenean Umeen Eguna. Biak ala biak herriko txikiei eskainitako ekitaldiz betetako egunak. Jolas, tailer, zezentxo, lehiaketa eta bestelakoen artean, haurrentzat antolatutako herri bazkariak erakarriko ditu gaztetxoak, asteazkenean, 14:00etan.

Osteguna Jubilatuen Eguna izango da, ostirala Gazteen Eguna eta larunbata, festetako azkena, baserritarrena. Sokamuturra, musika emanaldiak, gastronomia lehiaketak, kirol ekitaldiak... Aspertzeko tarterik ez da izango.