Juantxo Arregik omenaldia jaso zuen Adunako Axeri Dantza berreskuratzen egindako lanagatik

Adunako Axeri Dantza Taldeak Andoaineko Juantxo Agirre omendu zuten eta plaka bat eman zioten oroigarri gisa. Agirrek Adunako taldeari erakutsi zion herrian jada galduta zegoela dantza tradizioa. Urte askotan eta aurten ere, herriko taldearekin batera parte hartu du ekitaldian.

Dantza berreskuratzea

Axeri Dantza Gipuzkoako hainbat herritan dantzatzen zen herriko jai garrantzitsuenetan. Hala ere, piskanaka galduz joan zen eta XX. mende hasierarako Andoainen eta Adunan bakarrik mantentzen zen. Herri hauetan dantza eta bere musika oso ondo menperatzen zituzten pertsonak zeuden gerora laguntza handia eskeiniko zutenak bere berreskurapenerako, hala nola, Inazio Aizpurua eta Bixente Olano Andoainekoak eta, Faustino Sorondo eta David Zabala Adunakoak.

Gerra Zibilarekin batera, 1930. hamarkadan, guztiz galdu zen dantza hau ekitaldi bezala. 1974 urtean, hala ere, Andoaineko Lizar Makil Dantza taldeak Axeri Dantzaren berri izan zuen Bixente Olanoren bidez. Momentu honetatik aurrera Inazio Aizpurua txistulariarekin harremanetan jarri ziren eta honek doinua eta dantza erakutsi zizkien. Dena dena, ez zen nahikoa izan eta koreografia osatzeko Faustino Sorondo eta David Zabalarengana jo behar izan zuten.

Honela, 1975 urtean lehenengo aldiz dantzatu zen berriro Adunan Axeri Dantza, Lizar Makil Dantza taldearen eskutik. Dantzaren muina mantendu egin zen, aldaketa bakarrak janzkerari eginez. Hasieran dantzari bakoitza nahi zuen bezala joaten zen, batzuk oso dotore eta besteak ez hain dotore.

Horregatik guztiek alkandora txuria, horren gainean blusa gorriak eta galtza ilunak eramatea adostu zen, baita buruan koloretako zapi bat. Gainera gutxieneko partaidetza zazpi dantzari izatea erabaki zen. Ordutik nahiko jarraian mantendu da ekitaldi hau herriko jaietan. Azken urteetan herriko gazteek osatutako talde batek dantzatzen du.