Dokumentuaren akzioak
Juan Ignazio Iztuetari buruzko dantza-ikuskizuna
'Zuria gure erara' Urnietako Saroben eskainiko da datorren asteburuan
Ideia Luis Mari Zaldua historialariarena izan da, koreografiak Edu Muruamendiarazek diseinatu ditu, eszena-zuzendaria Mikel Agirregomezkorta da, Egape taldekoek egingo dute dantza eta Anabas taldekoek joko dituzte musika-tresank. Antzezlea, beraz, Jon Unanue izango da.
‘Zuria gure erara’ ipini diote izenburu, izan ere hemezortzigarren mendeko gizon hark ‘Zuria’ izan zuen goitizena. Jakina denez, bi obra handi idatzi zituen: ‘Gipuzkoako dantza gogoangarrien kondaira edo historia’ eta ‘Gipuzkoako probintziaren kondaira edo historia’.
Ikuskizunaren helburuak dira erakustea nolakoa zen Iztueta eta nolakoa zen orduko Gipuzkoa. «Iztuetak Gipuzkoako dantzen kanona edo eredua izango zen dantza bilketa bat egin zuen. Bilduma hori oso modu zurrunean ibiltzen da, gauza ukiezin bat bezala. Iztuetaren bizitzari begiratuz gero, ordea, ikusten da bera ez zela inondik inora pertsona zurrun bat; guztiz libertarioa eta gauzak bere erara egitea gustatzen zitzaiona baitzen. Alderaketa horretan paradoxa bat ikusten dugu argi eta garbi, eta hori da obraren abiapuntua», esan du Zalduak.
Iztuetaren hitzetan oinarritutako emanaldia izango da. Hala ere, Iztuetaren «irakurketa libre bat» egin dute.
Hau da sinopsia: Juan Ignazio Iztueta Zuria aldaketa garaian bizi izan zen; Ilustrazioa, Frantsesadak eta Lehen Karlistada bertatik bertara ikusi zituen. Bizitza luze bezain betea izan zuen, ez baitzen geldi egoteko horietakoa: dantzari fina, hiru aldiz ezkondu zen, espetxean egon zen, hainbat lan idatzi zuen euskaraz...
Dokumentuaren akzioak