Joxe Miel Bidador idazle eta literatur ikerlaria hil da

Idazle klasiko askoren lana berreskuratu zuen, eta 'Egunkaria' izan zuen hainbat urtez horretarako plaza

Ezustekoan harrapatu ditu adiskideak Bidadorren heriotzaren albisteak, eta samina zabaldu du euskal letretan. Bidadorren omenezko bloga sortu zuten atzo hainbat adiskidek (www.blogari.net/joxemiel), eta Jon Alonso eta Patxi Larrionen testu batekin jarri zen abian. «Joxe Miel bezalakorik ez zegoen Iruñeko -eta Nafarroako- euskara biziaren eta idatziaren azken aztarnen bila aritzeko», diote. «Joxe Mielek geure buruarengan sinisteko indarra ematen zuen bere jakinduriaz».

Hobiratzea gaur, Baternainen

Hobiratzea gaur egingo dute, 16:30ean, Baternainen; Baternanaingo herribatzarreko lehendakaria zen, izan ere, Bidador. Etzi egitekoa den omenaldi zibila ere prestatzen ari dira.

Iruñean jaio zen, 1970ean, Joxe Miel Bidador Gonzalez. Euskal Filologian lizentziatu, eta euskara irakasle izan zen Iruñean nahiz Nafarroako hainbat herritan. Aldizkari askotan argitaratu zituen idazlanak: Euskera, Fontes Linguae Vasconum, RIEV, Sukil...

Euskal idazle klasikoen inguruan artikulu ugari idatzi zuen Euskaldunon Egunkaria-ko Nafarkaria gehigarrian 1995etik 2001era bitarte, Klasiko bitxi arront klasiko sailean. Aspaldiko idazleei buruzko artikulu dokumentatu eta pertsonalak idatzi zituen, eta gehienetan idazle aski ahantziak ziren protagonistak.

Diario de Noticias eta Euskalerria Irratian ere kolaboratu zuen. Larreko Saria eman zion irrati horrek 2007an. Iruñeko Udalak idazle berrientzat antolatutako literatur lehiaketetan hainbat sari jaso zituen, poemekin nahiz narrazioekin. Bidadorren poema batzuk on-line daude Euskal Idazleen Elkartearen webguneak hari eskainitako orrian (www.idazleak.org).

Jose Agerre, Alexander Tapia Perurena eta beste hainbat idazleren antologiez gain, Materiales para una historia de la literatura vasca en Navarra (2004) eta Dantzaren erreforma Euskal Herrian (2006) liburuak argitaratu zituen; azken lan horrekin Bilboko Udalak antolatutako Miguel de Unamuno saiakera saria irabazi zuen 2005ean.