Jose Jabier Abasolo 'Tiliño' omenduko dute etzi Euskal Herriko Trikitixa Egunean

Trikitilari, bertsolari eta dantzariak ariko dira Iurreta eta Durangon, kulturaren alde egin duen lana eskertzeko

Jaiari 11:00etan ekingo diote, Iurretatik hasita, bi herriak elkartuko dituen kalejira batekin. 12:30ean herriko plazan elkartuko dira guztiak, Tiliñori omenaldia egiteko. Besteak beste herriko dantzariek, bertsolariek eta Iñaki Zabaleta eta Joxe Mari Santiago Motriku trikitilariek hartuko dute parte ekitaldian. Aldez aurretik sarrera erosi dutenek bazkaria izango dute gero Durangoko Landakon; eta bazkalostean, 17:30ean, entzuleak dantzan jarriko ditu Gozategik. Bi ordu geroago emango diote amaiera Trikitixaren Egunari.

Euskal kulturaren zalea

Tiliño «ofizioz tornulari, baina, afizioz, euskal kultur zale» gisa deskribatzen du Euskal Herriko Trikitixa Elkarteak. Iurretako Antzinako Instrumentuen Eguna antolatu zuen 25 urtez: 1974tik 1999ra. Euskal kulturaren berpizkundearen hastapenetan, frankismoaren erregimena bere azkenetan zela, Serafin Aranzeta Oromiño soinu jotzailea omentzeko ekitaldiarekin hasi zena, trikitilarien inguruko jai garrantzitsu bihurtu zen azkenenerako. Urte horietan, 75 urtetik gorako soinu jotzaile eta musikari ugari omendu zituzten, eta trikitilari askorentzat lehendabiziko plaza garrantzitsua bihurtu zen egun hura.

Gaztetatik egin du lan euskal kulturaren alde. Hamabost urte zituela, herriko zenbait lagunekin batera San Migeletako Dantzari dantza berreskuratzeari ekin zion. Bizkaiko trikitilariekin harreman ona mantendu du, eta, oraindik ere, noizbehinka soinu jotzaileekin biltzeko ohitura du. Hainbat eta hainbat musikari omendu ostean, larunbatean bera izango da omendua.