Jon Vallejok eta Monica Zamorak jasoko dituzte dantza sariak

Alicia Amatriain izango da Dantzaren Eguna ospatzeko Donostian maiatzaren 2an egingo duten ekitaldian

Jon Vallejok (Donostia, 1985) Errebelazio saria jasoko du. Monica Zamorak (Ordizia, Gipuzkoa, 1974), berriz, 2003an utzi zuen Birminghamgo Royal Balleta, eta George Piper Dancers konpainian hasi zen beharrean. Ordudanik, lanen bat edo beste egin izan du zenbait talderentzat. Horrenbestez, denbora luzean eginiko ibilbidea aintzat hartzen duen saria jasoko du Zamorak, Arte saria. Dantzaren Nazioarteko Eguna apirilaren 29an izanagatik ere, maiatzaren 2an egingo dute gala, Viktoria Eugenia antzokian.

Alicia Amatriain (Donostia, 1980) eta Juan Carlos Santamariaren konpainia dantzatuko dira emanaldi horretan. Halaxe eskertuko dio Amatriainek Dantzari Profesionalen Gipuzkoako Elkarteari iaz Espainiako Dantza sarirako hautagaitza bultzatu izana -Santamariak 2008an eskuratu zuen garaikur hori-. Alabaina, Lola Grecori eman zioten Espainiako saria.

Amatriain Jason Reillyrekin dantzatuko da Donostian, Stuttgarteko Balleteko dantzari nagusiarekin. Gala horretan parte hartuko dute, halaber, Biarritzeko Balletak, Verdini Dantza Taldeak eta Aukeran, Kukai, Tapeplas, Dantzaz eta Acroindar konpainiek.

Ikastaroa Artelekun

Dantzaren Hilabeteak egitarau oparoa izango du. Horren barruan egiten ari dira atzodanik dantza klasikoko, garaikideko eta jazzeko mintegia Artelekun. Marta Ortega ematen ari da dantza klasikoko eskolak, Angela Rodriguez dantza garaikidekoak eta Laura Garcia ari da arduratzen hala nahi dutenak jazz dantzan trebatzeaz.

Nolanahi den, aurten Dantza Kalean eta Kontxa hondartzako barandako dantza klasikoko erakustaldia Olatu Talka deritzon jaialdi berriaren barruan egingo dituzte. Hilaren 23tik 25era egingo dute festibal hori, Donostia 2016ko Europako kulturaren hiriburu izateko hautagaitza bultzatzeko xedez.

Hortaz, Dantza Kalean jardunaldia hilaren 24an egingo dute, goizez. Jazz, funky eta dantza garaikideko piezak erakutsiko dituzte udaletxeko terrazan hainbat sortzailek. Kontxako barandako erakustaldia, berriz, hilaren 25ean izango da, eta, antolatzaileek diotenez, 1.500 bat dantzari bilduko dira, bederatzi eta hamabi urte artekoak. Odon Elorza Donostiako alkateak ez du baztertzen datorren urtean beste herrialde batzuetara ere zabaltzea ekimena, eta Kontxan ez ezik Zurriolako hondartzan ere antolatzea erakustaldia.

Dantzari Profesionalen Gipuzkoako Elkarteak antolatzen du Kontxako barandako erakustaldia, 1997tik, eta urtetik urtera ekitaldia sendotu eta egonkortu dela uste dute antolatzaileek. Dantza sustatzeko eta diziplina horren egoera «babesgabea» salatzeko ekimena da. Izan ere, goi mailako dantza klasikoan trebatzeko eta lan egiteko azpiegiturarik ez dago ia Euskal Herrian, eta bidean aurrera egin nahi dutenek atzerrira joan behar dute ezinbestean.