Jon Ibarguren eta Idoia Besada irabazle dantza solteko txapelketan

Urtero bezala, Segurako Baratze pilotalekuan egin zen Euskadiko dantza sueltoko lehiaketarik garrantzitsuena, non dantzariek txistuz jotako fandangoa eta arin-arina trikitixaz dantzatu behar izan zituzten. Faborito nagusien artean ez zeuden irabazleak eta bai, ordea, Arkaitz Pascuas eta Nagore de las Cuevas eta Xabier Segura eta Lierni Martiarena. Hala ere, berehala konturatu ziren ikusleak Jon eta Idoia irabazleen dantza saioa bikaina izan zela eta inor ez zen harritu garaile izendatu zituztenean. Ez zen iritzi berekoa Jon Ibarguren, bikote irabazleko mutila. Azpeitiarraren esanetan, «ez genuen inola ere espero irabaztea. Gustura geratu gera egindako saioarekin, baina hemen maila handia dute dantzari guztiek, ez dago huts txikiena ere egiterik eta ni iaz nahastu egin nintzen. Zazpigarren sailkatu ginen eta asko sentitu nuen Idoiagatik. Aurten lasai etorri naiz, disfrutatzera eta, begira, irabazi egin dugu. Hau sekulakoa da».

Jon Ibarguren (Azpeitikoa, 20 urte) eta Idoia Besada (Pasaiakoa, 18 urte), ez dira ezezagunak Segurako txapelketan, Jonek laugarren partaidetza baitzuen lehiaketan eta hirugarrena Idoiak. Elkarrekin bikotea osatuaz bigarrena. Euskadikoaz gain, aurten aurrez irabazita dituzte baita ere Gipuzkoa eta Arabako txapelketak. Erabat hunkituta igo ziren biak sariak jasotzera oholtza gainera eta garaipena beraien gurasoei eta entrenatzaileari eskaini zieten. Entrenatzailea Lourdes Esnaola dute, Lezoko dantzaria, eta Seguran hainbat aldiz irabazitakoa.

10 bikote

Atzoko lehiaketan 10 bikote aritu ziren dantzan oholtza gainean, horietatik 7 gipuzkoarrak eta 3 bizkaitarrak. Bi bikote neskez osatutakoak ziren, gaur egun zaila baita mutilak topatzea dantza soltean. Hauek dira parte hartu zuten bikoteak, dantzatu zuten ordenean: Aritz Arrillaga eta Amaia Bolinaga ( Bergara), Itziar Doyharzabal eta Amaiur Luluaga (Ibarra-Anoeta), Arkaitz Pascuas eta Nagore de las Cuevas (Sestao), Goreti Galarraga eta Maria Camarero ( Ibarra-Tolosa), Xabier Segura eta Lierni Martiarena (Hernani), Iker Sanz eta Lierni Kamio ( Lezo-Villabona ), Ohian Martinez eta Ibabe Beristain ( Trapagaran-Portugalete), Jon Ibarguren eta Idoia Besada (Azpeitia-Pasaia), Aitor Arrieta eta Uxue Arrieta (Errenteria) eta Lander Campos eta Haizea Hormaetxea (Santzurtzi-Leioa).

Dantza jaialdian beste sariketa bat ere egoten da, jantzien dotorezia eta ikusgarritasunarena hain zuzen. Horretarako dantzariek Euskal Herriko jantzi tradizionalak eraman behar izaten dituzte soinean eta atzokoan, iaz bezala, aurtengo irabazleek, Jon Ibarguren eta Idoia Besadak eskuratu zuten saria. Bikote gazteenaren saria Oihan Martinez eta Ibabe Beristainentzat izan zen, eta lehen aldiz parte hartu eta ongien sailkatutakoentzat eskaintzen den Gillermo Areizaga saria Aitor eta Uxue Arrietak irabazi zuten.

Epaimahaia bost dantza adituk osatu zuten: Rafa Salaberria, Karlos Sarriegi, Antton Mendizabal, Izaskun Iturri eta Gabriel Alonsok. Beraien erabakiek Euskadiko Dantzarien Biltzarreko federazioan ezarrita dauden solteko arauetan oinarrituak izan behar zuten, dantzarien erritmoa, bien arteko berdintasuna, zailtasuna eta dantzaren osotasuna baloratuaz.

DATUAK