Edukira salto egin | Salto egin nabigazioara

Tresna pertsonalak
Hemen zaude: Hasiera Hemeroteka Irakasleei gorazarre

Dokumentuaren akzioak

Irakasleei gorazarre

Olaeta balleta elkarteko kideak Bittor eta Lide Olaetaren omenez dantzatuko dira gaur Bilboko Arriagan

Egilea
Irune Berro
Komunikabidea
Berria
Tokia
Bilbo
Mota
Albistea
Data
2010/06/30

Denera, Olaeta Balleteko dantzari izandako 90 bat lagunek parte hartuko dute emanaldian. Baita Ines Uriarteren ikasleek ere. Uriarte Olaetako dantzari izanikoa da, baina bestelako bideari segitu zion, eta gaur egun aretoko dantzak irakasten ditu.

Jone Goirizelaiak eta Mari Carmen Muñozek zuzenduta, Kasket pieza dantzatuko dute aurrena, Jesus Guridiren musikarekin, eta haren barruan, arku-dantza, zahagi-dantza eta Zuberoako maskarada emango dituzte.

Dantza tradizionalak, euskal folklorea eta balleta nahasiko dituzte ekitaldian aurrera, Goirizelaiak azaldu duenez. «Bittor Olaetak irakatsi ziguna dantzatuko dugu, baina hark irakatsitako bidetik eginiko ekarpenekin». Hau da, gaur egungo ikuspegitik helduko diete garai bateko piezei.

Halaxe emango dute Oinkarin obra ere. Guridiren musikarekin emango dute Olaeta elkarteko dantzari ohiek. Lau urtaroak etorriko dira segidan, bizitzaren lau etapari buruzko euskal balleta. Bittor Olaetaren koreografia batean oinarrituriko obra da, eta Jose Luis Francoren musikarekin emango dute. Bittor Olaetaren beste bi koreografia ere eskainiko dituzte: Ilargibetea eta Amaia operako ezpatadantza eta Azkoitiko zalduntxoen minuetoa.

Halaber, Ines Uriartek eta Iñigo Fidalgok Isaac Rovirak sorturiko Ilunbetik argitara koreografia erakutsiko dute, bals ingelesa, slow fox-a, tangoa eta quick step-a uztarturik. Ondarruko Venezia, Uriartek eta Begoña Cregok osatutako pieza ere izango da Bittor eta Lide Olaetari eskainiko dieten omenaldiaren parte.

Egitarau zabala prestatu dute Olaeta balleta elkarteko kideek irakasle izan zituzten Bittor eta Lide Olaeta neba-arrebak omentzeko. Emilio Sagi Arriagako zuzendari artistikoaren esanetan, «ondo merezitako omenaldia da». Jose Maria Usandizagaren Mendi-Mendiyan zuzendu zuen Sagik Donostiako Viktoria Eugenia antzokian duela hogei bat urte, eta orduan ezagutu zuen Bittor Olaeta, galletaren koreografia hark egin zuen eta. Sagiren arabera, «euskal kultura modu unibertsalean konprenitu eta landu zuen» Bittor Olaetak. «Maila handiko musikari eta dantzariekin lan egin zuen Parisen, eta ezagutza hori guztia euskal kulturarekin uztartu zuen maisuki».

Dokumentuaren akzioak