Iparraldeko inauteriak Unescoren ondare izateko eskatu dute

Jean Michel Guilcher etnologoaren inauteriei buruzko lan sakona omentzeko baliatu dute ekitaldia

Iparraldeko Dantzarien Biltzarra, Herri Soinu, Euskal Kultur Erakundea, Lapurtarrak taldea eta CMDTA Federazioak izan dira ekimenaren bultzatzaileak.

Goizean goiz hasi zen atzo ekitaldia. 09:00etatik aurrera hainbat hitzaldi egon ziren Uztaritzeko Lapurdi gelan. Unescoren izendapenak Ipar Euskal Herriari ekarriko lizkioken onurei buruz aritu ziren hizlariak. Besteak beste, Pantxoa Etxegoin Euskal Kutur Erakundeko zuzendariak eta Pierre-Olivier Laulanne FAMDT Frantziako Musika eta Dantza Tradizionalen Elkarteen federazioko buruak hitz egin zuten.

Xabier Iltzaina Bordeleko CNRSko ikerlariak eta Thierry Truffaut etnologoak ere parte hartu zuten hitzaldietan. Biak Ipar Euskal Herriko inauteritako adituak dira.

Dantzak pisu handia izan zuen ekitaldian, euskal dantza tradizionalak ikusteko aukera izan baitzen.

Jean Michel Guilcher Bretainiako etnologoari omenaldia egiteko baliatu zuten ekitaldia. Ekimenaren antolatzaileen aburuz, «Iparraldean inauterietako ohiturak berpiztuak izan ziren Guilcherek eginiko lan sakonari esker». Guilcher ez zen ekitaldian izan, baina haren alaba Mone Guilcherek —etnologoa bera ere— aitak idatzitako eskutitza irakurri zuen.