Ipar Euskal Herriko bost arte eskolatan euskarazko ikasketen eskaintza garatuko dute

Ipar Euskal Herriko borondatezko bost arte egiturekin elkarlanean eta modu esperimentalean, euskarazko formakuntzarako sustapena eginen du Euskal Elkargoak heziketa artistikoko lanbideen neurrira. 2022ko apirilaren 1etik abenduaren 31ra bitartean, hamar laguneko talde bat euskarazko formakuntzan arituko da. Desmartxa sustengatzeko deliberoa Elkargoko kontseilu iraunkorrak hartu du martxoaren 15ean egin bilkuran.

Hazparneko Soinubilan (kantua, musika formakuntza) eta Hendaiako Lanetik Egina (gitarra, atelierrak) musika eskolan pertsona bana formatuko da, Errobiko Musikasen (musika formakuntza, pianoa) bi izanen dira eta Baionako Maurice Ravel kontserbatorioan (antzerkia, dantza) eta Euskal Herriko Goi Mailako Arte Eskolan (artearen historia, multimedia) hiru pertsonek segituko dute formakuntza. 

«Hezkuntza artistikoak desafio azkarrak ditu euskara belaunaldi berriei transmititzeko. Eskolaren jarraipen gisa, establezimendu horiek haur eta gazteen hizkuntzarekiko orientazio denbora luzatzea ahalbidetzen dute, zeinak plazeraren nozioetara eramaten dituen, euskara ikasteko eta erabiltzeko motibazioarekin jolastuz», dio Ipar Euskal Herriko instituzioaren deliberoak.

Euskal Elkargoak 2018ko ekainaren 23an onarturiko hizkuntza politikak eleaniztasuna garatzea zuen helburu. Horretarako, borondatea zuten arte eskolekin eta Euskal Herriko Goi Mailako Arte Eskolarekin bat, pixkanaka garatuko den euskarazko arte hezkuntza proposatuko dute.

Elkargoak herena diruztatuko du

Orotara, hamar formakuntzetarako 31.424 euroko buxeta aurreikusia da. Horietatik 10.028 euro Euskal Elkargoak jarriko ditu. Frantziar Estatu mailako lurralde funtzio publikoko zentro nazionalak (CNFPT) parte hartuko ez duenez, Ipar Euskal Herriko instituzioak ikasketa horien kostu pedagogikoaren %50 finantzatuko du Maurice Ravel kontserbatorioan eta Euskal Herriko Goi Mailako Arte Eskolan, bakoitzean 4.608 euro inbestituz. Beste erdia bi egituren gain geldituko da.

Hurbileko enpresen konpetentzien formakuntzaz arduratzen den OPCO egiturak Soinubila, Lanetik Egina eta Musikaseko formakuntzak diruztatuko ditu nagusiki.

Euskara informazio, komunikazio eta seinaletikan txertatzeari dagokionez, Euskal Elkargoak 300 hitzeko edo gutiagoko itzulpen laburrak eginen ditu. Itzulpen luzeentzat urteko 500 euro ordainduko ditu establezimendu bakoitzarentzat.