Hiru ikuspegi karrikan dantzan

Euskal dantza tradizionalak eta garaikideak nahastu ohi ditu Kukai dantza taldeak. Bide berari eutsi dio Karrikan lan berrian ere, baina beste pauso bat eman nahi izan du. Hiru koreografiarekin osatu du kaleko ikuskizuna, eta haiek lantzen taldetik kanpoko koreografoekin aritu da. «Interesgarria iruditu zitzaigun, gure lan ildotik abiatuta, dantzaren beste ikuspegi bat duten hiru koreografo garaikideri euskal tradizioan jatorria duten hiru gai proposatzea, eta ikustea gai hori nola landuko luketen eta gure lana nola ikusten duten», esan du Jon Maia dantzari eta lanaren zuzendariak. Askotariko estetika eta estilo nahasketa izan da emaitza. Bihar estreinatuko dute ikuskizuna, Leioako Umore Azokan (Bizkaia).

Iazko ekainean hitz egin zuten koreografoekin, eta azaroan elkartu ziren lehen aldiz, Errenterian (Gipuzkoa), piezak lantzen hasteko. «Gu haien munduan sartu ginen, haiek geurean, eta elkarlan horretatik atera dira hiru piezak». Iker Gomezekin ondu dute Aupa mutil! koreografia. Trikitiaren doinuak mugimendu garaikideekin nahasten dira, baita pauso tradizionalagoekin ere. Oihuka ere ariko dira dantzariak hainbat unetan. «Orain arte gorputza izan da gure lan tresna nagusia. Baina Ikerrek antzerki fisiko gisa definitzen du bere lana, eta testua, gorputz mugimendua eta ahotsa uztartu ohi ditu. Kasu honetan ere hala izan da; testu pixka bat dugu, eta ahotsa tresna indartsu gisa baliatzen da, oso presente dago piezan. Lan egiteko moduan aldaketa txiki bat ekarri digu, baina interesgarria izan da eremu horretan sartzea», esan du Maiak.

«Fandangotik gaur egun zer gelditzen den edo nola bizi dugun agertu» nahi izan dute Fight for Fandango piezan, Pantxika Telleria koreografoaren esanetan. Harekin landu dute pieza. Fandangoa edo jota zaharraren berreskuratze horretan, garai barrokoari keinuak egiten dizkiote.

Sorbatza da estetika urbanoena duen koreografia. Larruzko jakak soinean dantzatzen dute pieza hori lau taldekidek, lau bafle inguruan dituztela, eta giro musikaren erritmoei jarraituz, baita Johann Sebastian Bachen piano doinuei ere tarteka. La Intrusa Danza taldeko Damian Muñoz eta Virginia Garciarekin osatu dute koreografia.

Sei dantzari eta DJ bat

Sei dantzari ariko dira emanaldietan: Jon Maia bera, Alain Maia, Eneko Gil, Ibon Huarte, Nerea Vesga eta Urko Mitxelena. Haiekin batera, DZ Zigor Lanpre DJak jardungo du zuzenean. Haren zeregina nabarmendu du Maiak, «hiru piezak aintzat hartuta berak ematen baitio osotasuna ikuskizunari». Izan ere, askotariko musika estiloak uztartzen ditu. «Fandangoan, adibidez, denetarik dugu; barrokora, fandangoaren sorrera garaietara jauzi bat egiten da Domenico Scarlattiren musikaren bidez, baina Michael Jacksonen musika ere azaltzen da une batean, eszena ero samar batean».

Taupadak eta Soka-ren ondotik, kalean dantzatzeko prestatu duten hirugarren lana da Karrikan. «Polita da jendea antzokira zu ikustera etortzea, baina uste dut garrantzitsua dela, jendea dantza ikustera ohitzeko eta sentsibilizatzeko, gu kalera joatea, jendea dagoen lekura». Hurbiltasun hori lortzeko, eta interprete gisa kaleak «beste kode bat» eskatzen duelako, ariketa interesgarria iruditu zaio taldeari. Hala ere, aretoetan ere eskaintzeko aukera aztertzea ez dute baztertzen.

Biharko estreinaldiaren ondotik, etzi berriro Leioan eskainiko dute ikuskizuna. Heldu den astean, hilaren 20an, Donostiako Viktoria Eugenia antzokiko Club aretoan ariko dira, eta Hendaian hurrengo egunean. Handik Valladolideko (Espainia) Kaleko Arteen Nazioarteko Jaialdira joko dute. «Zorteko gaude, garai hauetan emanaldi batzuk iragarri ahal ditugulako ikuskizuna aurkeztearekin batera».

Kukai taldeko hainbat dantzari, atzo, Donostian, ikuskizun berriaren zati bat erakusten. / JON URBE / ARGAZKI PRES