Edukira salto egin | Salto egin nabigazioara

Tresna pertsonalak
Hemen zaude: Hasiera Hemeroteka Herrilan poetikoa

Dokumentuaren akzioak

Herrilan poetikoa

Kritika, Beau geste / sociedade masculina

Egilea
Agus Perez
Komunikabidea
Berria
Mota
Albistea
Data
2006/09/12

Garabiek eta makina handiek sortzen duten liluramenduak harrapatuta, hondeamakina bat dantzari moduan baliatzea bururatu zitzaion Dominique Boivin koreografoari. Horrela sortu zen Miarritzeko Dantza Maitaldian ikusitako Transports exceptionnels (Ohiz kanpoko garraioak) izeneko pieza. Izenburu azpiak dioen moduan, «hondeamakina eta dantzari banarentzako duoa da». Beraz, makinaren ezaugarriak guztiz garrantzitsuak dira dantzariaren txikitasuna eta makinaren handitasuna azpimarratzeko, baina proportzioak galdu gabe, bien arteko jolasa orekatua izan dadin.

Alde horretatik ere, oso makina erakargarria aukeratu dute -azken modelokoa, urdin argi kolorekoa eta ia-ia zarata eta kerik gabekoa-, eta bizi propioa izatearen sentsazioa areagotu egiten da kabina barruko gidaria -konpainiako beste kide bat- ikusten ez dugulako. Gauzak horrela, oso jolas erakargarria sortu zen dantzariaren eta makinaren artean: normala denez, izaki metalikoak bere beso mekaniko luzea eta muturreko pala edo koilara erabiltzen zituen gizonarekin harremanetan jartzeko. Gizonak, aldiz, makina probokatzeko, erakartzeko eta konkistatzeko taktika guztiak erabili zituen, harengana hurbilduz, haren inguruan zirkuluak deskribatuz, haren palatik eskegita eta beso gainean airetiko desplazamenduak eginez.

Emaitza guztiz bizigarria suertatu zen, Beau Geste konpainiako kideek maisutasun handiz maneiatu dituztelako begi-bistan zeuden kontzeptu kontrajarriak, makina bihozgabeari samurtasuna emanez eta gizon menperatzailea haren babespean jarriz, opera aria eder batzuek soinu-eremu bikaina eratzen zuten bitartean.

Igande arratsaldeko egitarauan Brasilgo Sociedade masculina konpainiak hiru koreografia aurkeztu zituen. Lehenengo bietan -Deborah Cokerren Laços (Loturak) eta Henrique Rodovalhoren Chorando (Negar egiten)- argi geratu zen konpainiako zazpi gizonek duten prestakuntza, mugimenduen garbitasunean eta forma fisiko landuan. Koreografiek, ordea, nekez transmititzen zuten euren xedea eta estudio edo dantza ariketa hutsaren sentsazioa utzi zuten, neurri batean soinu-banda desegoki eta zatikatuen eraginez.

Sao Paulo hiriari buruzko Transverso (Zeharkako) piezan, ordea, koherenteagoak izan ziren koreografia barruko eta inguruko elementuak. Soinu-bandaren nahasketa eta bideo-proiekzioak ikuspegi garaikideago batetik eginak ziren. Horri esker nabarmen areagotu zen proposamenaren interesa eta bere lekuan geratu zen dantzarien lan erakargarria.

Dokumentuaren akzioak