Edukira salto egin | Salto egin nabigazioara

Tresna pertsonalak
Hemen zaude: Hasiera Hemeroteka Herria agertoki denean

Dokumentuaren akzioak

Herria agertoki denean

Umore Azokak 46 kale-arte talderen lanak erakutsiko ditu gaurtik igandera bitarte, Leioan. 120 emanaldi eta hemeretzi erabateko estreinaldi izango dira
Egilea
Ainhoa Larrabe Arnaiz
Komunikabidea
Berria
Mota
Albistea
Data
2019/05/16
Lotura
Berria
Kale kantoian, plazan edo espaloi ertzean dagoen jarlekua: kale artistak gai dira hiriko edozein txoko agertoki bihurtzeko, eta Leioako (Bizkaia) Umore Azoka da horren erakusle. Euskal Herrian kaleko arte sorkuntzara bideratutako topaketarik handienetako bat da Leioakoa, eta hogeigarren aldia du aurten. Gaur hasiko da, eta igandera bitarte askotariko ikuskizunak bildu dituzte, Alberto Garcia Umore Azokako zuzendariak azaldu duenez. «Hogeigarren urteurrena dugu, eta programazioan kaleko artearen adierazpiderik ahalik eta zabalena biltzeko saiakera egin dugu». 46 konpainia izango dira orotara, eta hemeretzi erabateko estreinaldi ikusi ahal izango dira. «Inoiz izan dugun estreinaldi kopururik handiena da». Programan 120 ekitaldi baino gehiago bildu dituzte, baina, Diezek argi dioenez, Leioakoa azoka da, jaialdiaz harago. «Umore Azoka merkatu bat da: lau egunean ahalik eta estreinaldi gehien pilatzen saiatzen gara, Euskal Herriko eta nazioarteko programatzaileak eta konpainiak harremanetan jartzeko».

Diezek Euskal Herriko kale-arte konpainietan jarri du fokua. «Nazioarteko programatzaileekin harremanetan jartzeko sortu zen Umore Azoka, duela hogei urte. Euskal kale artearen erakusleiho izateko bokazioa zuen hasieran, eta helburu bera dauka oraindik». Euskal Herriko hogei konpainiak parte hartuko dute aurtengoan.

Bultzada Euskal Herrikoei

Antolatzaileen esanetan, kaleko artean dabiltzan euskal konpainientzat «erreferentziazko» jaialdia da Leioakoa, eta aurtengoan bilduko duen estreinaldi kopurua jarri du zuzendariak adibide gisa. «Parte hartuko duten hogei euskal konpainietatik hamabostek orain arte ikusi gabeko ikuskizun bat erakutsiko dute. Ezbairik gabe, ekitaldi batean biltzen den estreinaldi kopururik handiena da, baita euskal konpainia kontzentrazio handiena duena ere». Besteak beste, jaialdian izango dira, adibidez, Akelar, Intujai, La Glo Zirko Dantza, Teatro Organik, Trakamatraka, Trapu Zaharra eta Circo Dabitxi. Beren lanik berrienak erakutsiko dituzte talde gehienek.

Euskal Herriko konpainiez gain, nazioarteko hainbat izango dira Umore Azokan. Herrialde Katalanetatik zortzi konpainia izango dira, eta Belgika, Alemania, Italia eta Frantziako lanak ere ikusi ahalko dira. Leioako taldeen lanak ere erakutsiko dira jaialdian, Tokiko Eszena atalean. «Duela lau urte abiatu genuen, herriko taldeek hala eskatuta». Leioako Musika Bandak A Day at the Circus kontzertua eskainiko du; Fidias fundazioak The Last Wimba-Dinkas ikuskizuna, eta Zirkun Zirko Eskolak Zirkun txiki ikuskizuna.

Antolatzaileek 620 proposamen artistiko baino gehiago jaso zituzten guztira, eta horien guztien artean egin dute 49 konpainien hautaketa. Kalitatea, pluraltasuna eta originaltasuna dira, antolatzaileen hitzetan, aintzat hartutako irizpide nagusiak. «Antzerkia, dantza eta zirku garaikidea izango ditugu ardatz, baina komediarako, musikarako, magiarako, dantza bertikaletarako eta orekarientzako lekua ere egongo da». Herriko 30 espaziotik gora erabiliko dituzte horretarako.

Azoka den jaialdia

Ikuskizunez gain, konpainiaren eta programatzaileen arteko hartu-emanak sustatzeko, gogoetarako gune bat egokituko dute. Zehaztu dutenez, mundu osoko berrehun profesional baino gehiago izango dira azokan. Hiru nabarmendu dituzte: Sarearev-Antzokien Euskal Sarearen Batzar Nagusia; euskal konpainien proiektu artistikoen berri emango duen IV. Artekale-Sarea topaketa, eta arte eszenikoen merkatuaren etorkizunaz gogoetatzeko topaketa. Negozio bilera azkarrak ere egingo dituztela azaldu du jaialdiaren zuzendariak. Konpainientzat eta programatzaileentzat ez eze, herritarrentzat ere ezinbesteko ekitaldia da Leioakoa, eta iazko datuak jarri ditu horren erakusle: 37.000 lagun elkartu ziren.

Leioako Udala da egitasmoaren antolatzailea, baina Eusko Jaurlaritzak eta Bizkaiko Foru Aldundiak ere laguntzen dute jaialdia. Zuzendariak aitortu du aurtengoan iaz baino laguntza handiagoa izan dutela, eta, zehaztu duenez, 300.000 euro inguruko aurrekontuarekin antolatu dute azoka.

Informazio gehiago nahi izanez gero, jo webgune honetara:

www.umoreazoka.org
Kaleko arte sorkuntzara bideratutako jaialdirik handiena da Leioako Umore Azoka. Gaur hasiko da.
Kaleko arte sorkuntzara bideratutako jaialdirik handiena da Leioako Umore Azoka. Gaur hasiko da.MARISOL RAMIREZ / FOKU 

Dokumentuaren akzioak