Edukira salto egin | Salto egin nabigazioara

Tresna pertsonalak
Hemen zaude: Hasiera Hemeroteka Hasi da joaldun hotsa Iturenen eta Zubietan

Dokumentuaren akzioak

Hasi da joaldun hotsa Iturenen eta Zubietan

Egilea
Edu Lartzaguren
Komunikabidea
Berria
Tokia
Malerreka
Mota
Albistea
Data
2022/01/31
Lotura
Berria
Iturengo joaldunak, gaur goizean.
Iturengo joaldunak, gaur goizean. BERRIA

Hartza dantzan, eta joareak danbadaka. Neguaren gorrian, lurra iratzartzeko hotsak aditzen hasi dira Iturenen eta Zubietan (Nafarroa).

Koronabirusaren izurriak ez ditu gelditu, nahiz eta inguruko hainbat herritan inauteriak bertan behera utzi dituzten; esaterako, Leitzakoak joan zen astean. Zubietan eta Iturenen jaiak ospatzea erabaki dute, baina normalean herriotan jasotzen dituzten bisitariei ez joateko eskatu diete.

Atzo, Iturengo joaldunak puska biltzen aritu ziren.

Herritik kanpo inor gutxi zegoen, Jagoba Manterola Foku agentziako argazkilaria iturendarrak Euskalerria irratiko Metropoli forala saioan gaur kontatu duenez.

Manterolaren arabera, inauteriari benetakotasun kutsua eman dio turistarik ez egoteak. Bera haurra zeneko giroa etorri zaio gogora: «Orduan, karroza batzuk baziren, gutxi baina baziren. Joaldunak ere bai. Eta jendea etortzen zen, baina gutxi. Kulturako jendea etortzen zen. Barojatarrak edo Oteiza bezalakoak. Margolari pila bat. Bidasoko lurralde hau kulturalki beti izan da erreferentzia bat, mendeetan. Agian horretara itzultzen ari gara, modernitate puntu batekin».

Gogoratu duenez, azken urteotan hamar bat autobus eta hainbat auto heldu izan dira inauteriak ikustera. Horrek herriak berak duen biztanleria bikoizten duela azaldu du.

Zubietan, urtarrilaren 15ean erabaki zuten inauteriei eustea, eta Iturengoek ere baiezkoa eman zioten proposamenari.

Edonola ere, neurri bereziak hartu dituzte. Esaterako, Zubietako otorduetan hirurogei pertsona bakarrik hartuko dituzte estalpean, eta zerrenda bat osatu dute izena emandakoekin.

Horrez gain, musika emanaldia bakarrik gaur eta bihar egingo dute, dantzarik gabe, eta, bazkaria bezala, bakarrik gazte taldeetako kideentzat.

Dokumentuaren akzioak