Hamaika herri Olentzerori harrera egiteko prest

Neguko solstizioa ospatu eta eguberriei ongi etorria emateko hitzorduak ez dira falta egunotan eta urtez urte, Olentzeroren etorrera ospatzeko gero eta hitzordu gehiago egiten dira Ipar Euskal Herrian. Hona, kronologikoki ondoko egunotako ospakizunak:

Abenduak 15, osteguna

Osteguneko bazkalostean ekinen diote Olentzerori ongi etorria emateari: Ezpeletan 14.00etan eman dute hitzordua. Baionan, berriz, 17.30ean hasi eta arratsalde osoko egitaraua antolatu dute. Gaskoien plazan da hitzordua, 'Olentzero eta konpainia' izenpean.

Bide beretik, Hendaiako mediatekan 'Neguburu, Eguberri eta Olentzero euskaldunen mundu magikoan' mintzaldia izanen da. 18:30ean hasiko da, euskaraz, frantseserako bat bateko itzulpenarekin.

Abenduak 16, ostirala

Donapaleuko herria izanen da asteburuan Olentzeroren besta ospatzen lehena, merkatuan eman baitute hitzordua goizeko 10.00etan. Ondotik, Bardozeko karriketan gaindi ibiliko da 14.00etatik aitzina eta Azkainekoetan gaindi, berriz, 17:30etatik goiti.

18.00etan beste hiru hitzordu badira: Senpereko Larreko plazan, Uztaritzeko Lota plazan (Purguko plazarainoko ibilbidea egiteko) eta Biriatuko frontoian. Azken hauek «zatoz zure linternarekin!» mezua pasarazi diete herritarrei.

Olentzero gaualdiaren kari, Bardozen dantzaldia antolatu dute Bardozeko Lagunekin, Irisarriko Denentzat, Baionako Dantz’Ari eta Angeluko Angeluarrak dantza taldeek. Gaueko 20.00etan berrogei bat dantzarik 30 minutuko ikusgarri bat aurkeztuko dute eta, ondotik, gazteek sortutako neguko soka dantza eskainiko dute.

Abenduak 17, larunbata

Larunbatarekin ere 10.00etan hasiko dira Olentzeroren etorrera ospatzen Hiriburuko eta Atharratzeko karriketan gaindi. Bidarteko karriketara ordu batzuk berantago iritsiko da, 14:00etan, hain zuzen ere.

15.00etan dira ondoko hitzorduak, Lekuineko karriketan eta, berriz ere, Baionan, oraingoan Xahokaian. Saran bi aukera eman dituzte: 16.00etan Keinun krakada egiteko ala 17.30ean plazan, Olentzero eta Mari Domingiri agurra egiteko.

Irisarriko karriketan 17.00etatik goiti ikusi ahalko da Olentzero eta, Hazparnen, berriz, 18.00etatik aitzina 'Mari Domingi eta Olentzero' izenpean Harana plazan eman hitzorduarekin.

Abenduak 18, igandea

Igande goizean, berriz, Lapurdi kostaldean izanen da Olentzero. Angelun 9.00etan Pignada kiroldegian bilduko dira lehenik eta arratsaldeko 16.30ean Biarritzeko Santa Eugenia plazan ondotik. Itsasun ere bada hitzordua: 17.30ean herriko etxean.

Neguko tradizioen transmisioa

Hitzordu anitzak Ipar Euskal Herrian neguko tradizioak bizirik daudenaren erakusle diren gisan, Olentzeroren Lagunak elkartearen dokumentala ere hala da. «Olentzero eta Joaldunak: neguko tradizioak Euskal Herritik Argentinara» izeneko proiektuarekin bidaiatu zuten Argentinara, irailaren 28a eta urriaren 11 bitarte.

Bidaiaren helburua lortu dute: «Transmisioa» dokumentala ekoiztea. Baionako Merkataritza Ganbarako entzutegian estreinatuko dute, abenduaren 19ko 19.00etan.