Nazioarteko egunaren antolakuntza errazagoa izan dadin sortu dute elkartea, Vicente Martin lehendakariak azaldu duenez. «Baina egun horretako ospakizunetatik haratago joan nahi dugu. Gure helburua dantza sustatzea da. Iruñekoak gara talde gehienak, baina Iruñetik kanpo ere sustatu nahi dugu».Lan hori nola eginen duten ez dute zehaztu, oraindik. Elkartea sortu berria baita, eta lehenbiziko egitekoa jendea eta dirua biltzea dute. Dozena bat talde daude, oraingoz, Haizean. Dantza garaikideko eta klasikoko taldeak dira, gehienak, baina badira bertzelakoak ere; hala nola, capoeira dantza eta sabel dantza irakasten dutenak, bai eta gutxitu fisikoekin lan egiten dutenak ere.Dantza tradizionala egiten duen talderik ez da, oraindik, Haizean sartu. Baina hemendik gutxira talderen bat edo bertze sartzea espero dute. «Ateak erabat zabalik ditugu dantzaren alde lan egin nahi duten guztiendako», erran zuen Martinek. «Eta, nola ez, hemengo dantzak egiten dituztenendako».Elkarte berriak Barañaingo auditoriumean izanen du egoitza, auditoriumekoek lan handia egin baitute dantza taldeak elkar daitezen.

Erakustaldia larunbatean

Erran bezala, Haizeak larunbatean eginen du bere lehen ekitaldia. 17:30ean, Iruñeko Rodezno Kontearen plazan, dantzari txikienek eskoletan ikasitakoa erakutsiko dute. Ondoren, Karlos III.a etorbidean, dantza mota askoko erakustaldia eginen dute. Arratsaldean, Barañaingo auditoriumera pasatuko da ikuskizuna. 20:30etik aurrera, hamabi bat taldek beren lanen erakustaldia eginen dute, ordu eta erdiz.