Gorputza dantzan, erromerian

Ereintza dantza taldeak antolatuta, 11. Erromeria Eguna egingo dute Errenterian, uztailaren 18an

Hori izango da datorren larunbatean, uztailaren 18an, Errenterian egingo den Erromeria Eguneko osagai nagusia.

Zatoz plazara dantzara lelopean, Txorimaloak, Alkarbide, Oarsoaldeako dultzaineroak eta txistulariak, Naroa eta Arrate, J. M. Beltran eta Astiasaran anaiak, Urarte eta Aiko taldeak eta Txirri, Mirri eta Txiribiton Junior taldeek parte hartuko dute.

Ikusleak lekuko huts izan gabe, bilduko direnak dantzan jarri nahi ditu talde errenteriarrak. Egitarau zabala antolatu du helburu hori lortzeko asmoz.

Goizeko hamarretan izango da diana, eta ondoren, festan parte hartuko duten talde guztiei ongietorria egingo diete. Ordubete geroago, hamaiketakoa prestatu dute antolatzaileek; irekia izango da, nahi duena joan dadin. Parte hartzen duten taldeen eta joaten direnen artean lehen harremanak eginda, kalez kale ibiliko dira musikariak eta dantzariak.

Urtero eguerdian egiten duten emanaldia berezia izango da aurten, lehen aldiz nesken sokadantza ikusi ahalko baita. 13:15ean izango da, Zumardian. Jon Maya dantzariak azaldu duenez, «sokadantza edozein festa, jaialdi edo herriko jaietan egiten den dantza soziala da. Dantzatzeko modu asko daude, baina azken urte hauetan Oarsoaldean, gizon dantza da gehien ezagutzen dena».

Gaineratu du, Errenterian, adibidez, San Joan bezperan mantendu dela erritual gisa. «Horregatik, nesken sokadantza bultzatu nahi genuen, eta Erromeria Eguna aproposa iruditu zitzaigun horretarako. Ereintza taldeko zein herriko neskek dantzatuko dute, eta ohitura bihurtzea gustatuko litzaiguke».

Bestalde, laurehun lagun ingururentzat bazkaria prestatuko du Intxaurrondo elkarte gastronomikoak. Udal kiroldegian bilduko dira bazkaltzera talde guztietako partaideak, eta nahi duen beste edonork.

Haurrek ere musikaz eta dantzaz goza dezaten, eta beraiek ere festaren partaide izateko asmoz, Txirri, Mirri eta Txiribiton Junior pailazoek emanaldi berezia prestatu dute. «Ez da izango beraien betiko ikuskizuna, baizik eta Erromeria Egunerako moldatua. Ohiko dantzekin batera, umeak pailazoekin dantzatuko dira, umeek ere festan parte hartu dezaten, haurrentzat oso aproposak diren abestiekin. Saio berezia izango da, umeei ere dantzarekiko zaletasuna pizteko», esan du Mayak.

Dantzarako une nagusia 18:00etan hasiko da, herriko hainbat gunetan.

Erromeria nagusia hasten denenean Zumardiko oholtza gainean, festa handi horretan parte hartuko duten talde guztiak igaroko dira. Musikarien laguntzaz, dantzarako aukera izango da estilo guztietan. Aiko taldeak 18:30ean Zumardian bertan egingo du emanaldia.

Aldi berean, herrigunean zehar kokatuta dauden gainontzeko agertokietan ere -Leku Zarran eta Xabier Olaskoaga plazan- etengabe egongo dira musika emanaldiak.

Herri dantzei eta erromeriei bultzada emateko asmoz, Ereintza dantza taldeak 1999an jarritako proiektua da Erromeria Eguna, eta 11. aldia izango du aurten.

«Helburua jendeak dantzak ezagutzea eta horiekin gozaraztea izan da beti, baina parte hartuz eta dantza eginez», dio Mayak. Hori helburu izanda, lehen pausoa herri dantzen ikastaroak martxan jartzea izan zen, herrian eta eskualdean; ondoren, Erromeria Eguna prestatzea, dantzan ikasten zebiltzanak eta dantza gustuko zutenek bilgune bat izateko.

UZTAILAK 18, LARUNBATA

10:00. Diana, herriko kaleetan zehar.

11:00. Hamaiketakoa, Esmalterian.

12:00. Kalez kale. Musikariak eta dantzariak herriko kaleetan ibiliko dira.

12:15. Ereintza taldeko neskek zein herriko neskek sokadantza egingo dute, Zumardian.

14:30. Herri bazkaria, Udal Kiroldegian.

17:30. Txirri, Mirri eta Txiribiton Junior pailazoen emanaldi berezia, Xabier Olaskoaga plazan.

18:00. Erromeria handia egingo dute, Zumardian, Leku Zarran eta Xabier Olaskoaga plazan.

18:30. Aiko musika eta dantza maisuen kolektiboa izango da Zumardian.